Mass Alert júıesi: Almaty turǵyndaryna shuǵyl habarlama keldi

ASTANA. KAZINFORM – 17 qazan kúni tańerteń Almaty turǵyndary «prezıdenttik habarlandyrý» aldy – qalada Mass Alert eskertý júıesi synaqtan ótti.

Bul joly tek Android qurylǵylaryn ǵana emes, iOS qurylǵylaryn da qoldanýshylar habarlama aldy.

Buǵan deıin qala ákimdigi qala turǵyndary men qonaqtary Mass Alert eskertý júıesinen habarlama alý úshin iPhone qurylǵylaryn iOS 18 nusqasyna jańartý qajet ekenin habarlaǵan bolatyn.

«Habarlama synaq sıpatynda bolǵandyqtan, qala turǵyndary men qonaqtary alańdamaýy kerek. Endi habarlandyrý iOS operatsııalyq júıesiniń paıdalanýshylary úshin de qoljetimdi bolady», - dep habarlady buǵan deıin ákimdikte.

Mobıldi qurylǵy paıdalanýshylary «Ulttyq habarlandyrý» dep belgilengen synaq eskertýin aldy, al keıbir Android operatsııalyq júıesi bar qurylǵy paıdalanýshylaryna «Prezıdenttik habarlandyrý» dep belgilengen synaq eskertýi keldi.

Eske sala ketsek, aǵymdaǵy bıylǵy 31 mamyrdaǵy birinshi kezeńde Android operatsııalyq júıesi bar qurylǵylardy paıdalanýshylar úshin testileý sátti júrgizildi. Buryn habarlanǵandaı, ekinshi kezeńde elektrondyq habarlandyrý júıesine iOS qurylǵylaryn paıdalanýshylar qosylady.

Eske sala ketsek, búgin Almatyda 2 baldyq jer silkinisi tirkeldi.