Másimovtiń jekejaıynan alynǵan samýraı qylyshy 540 myń teńgege satyldy

ASTANA. KAZINFORM — Qaıtarylǵan aktıvterdi basqaratyn kompanııa buryn tárkilengen múlikti, sonyń ishinde sándi saǵattar, zergerlik buıymdar jáne aksessýarlardy satylymǵa shyǵardy.

Aýktsıonǵa barlyǵy quny 520 mln teńgeden asatyn 42 sándi zat qoıyldy. Álemdik brendterdiń zergerlik buıymdary men saǵattardyń kóbi satyp alýshylaryn tappady.

Satylǵan jalǵyz zat — Ulttyq qaýipsizdik komıtetiniń (UQK) burynǵy basshysy Kárim Másimovtiń úıinen alynǵan «qynabyndaǵy samýraı qylyshy» boldy. Onyń satý baǵasy 540 myń teńge. 

Buǵan deıin qylyshtar, monetalar jáne basqa da qaıtarylǵan aktıvter aýktsıonda 10 mln teńgege satylǵan.

Sondaı-aq Kárim Másimovtiń Astanadaǵy záýlim saraıy Oqý-aǵartý mınıstrligine berilgenin jazǵan bolatynbyz. 

Aıta ketsek, bıyl 10 aqpanda Kárim Másimovtiń Astanadaǵy záýlim saraıy 1,8 mlrd teńgege satylymǵa shyǵarylǵan edi. 

Alaıda 25 aqpanda ótken aýktsıonda Kárim Másimovtiń záýlim saraıyn eshkim satyp almady. 

Naýryz aıynda Kárim Másimovtiń záýlim saraıy qaıta satylymǵa qoıyldy. 

Erejege sáıkes, aýktsıon jeńimpazy aýktsıon aıaqtalǵannan keıin 10 jumys kúni ishinde satýshymen mámile jasasýy kerek. Jeńimpaz aktıvti tek qarajat satýshynyń shotyna tolyq eseptelgennen keıin ǵana alady.

Satýdan túsken qarajat arnaıy memlekettik qorǵa aýdarylady, onyń qarajaty bilim berý, densaýlyq saqtaý, ınfraqurylym salalaryndaǵy áleýmettik mańyzdy jobalardy qarjylandyrýǵa jáne azamattardyń áleýmettik jaǵynan osal sanattaryn qoldaýǵa jumsalady.

Eske sala keteıik, Ulttyq qaýipsizdik komıtetiniń burynǵy tóraǵasy Kárim Másimov 2022 jyly 8 qańtarda ustaldy.