Másimovtiń satylymǵa shyǵarylǵan záýlim saraıynyń quny arzandady

ASTANA. KAZINFORM — Kárim Másimovtiń elordadaǵy záýlim saraıy úshinshi márte aýktsıonǵa shyǵaryldy.

Ulttyq qaýipsizdik komıtetiniń tóraǵasy bolǵan Kárim Másimovke tıesili úıdiń bastapqy baǵasy birinshi ret saýdaǵa shyǵarylǵan kezde 1,8 mlrd teńgege baǵalanǵan edi. Al qazir 1,6 mlrd teńgege deıin tómendetilip otyr. Alǵashqy jarnasy 117,9 mln teńgeni quraıdy. Ótinimderdi qabyldaý 13 mamyr kúni saǵat 9:00–ge deıin júrgiziledi. Sol kúni saǵat 11:00–de saýda-sattyq ótedi.

Záýlim saraı buǵan deıin 25 aqpanda, odan keıin 12 naýryzda satylymǵa shyǵarylǵan edi. Alaıda, ol kezde úıdi satyp alýshy tabylmady.

Eske salaıyq, UQK burynǵy tóraǵasy Kárim Másimov 2022 jyly 8 qańtarda ustaldy. 

UQK taratqan málimet boıynsha, Másimovtiń premer-mınıstr laýazymynda bolýy kezeńinde bıznes-qurylymnyń birinen astanada quny 2,5 mlrd teńge elıtalyq turǵyn úı men jer telimin alý faktisi boıynsha tergeý júrgizildi. 

Másimovtiń isi «asa qupııa» belgisimen ótti. ol 18 jylǵa bas bostandyǵynan aıyrylyp, múlki tárkilendi. Ómir boıy memlekettik qyzmette jumys isteý quqyǵynan qaǵyldy.

Ótken jyldyń shildesinde Prezıdent Qasym-Jomart Toqaev QR Ulttyq qaýipsizdik komıtetiniń burynǵy tóraǵasy Kárim Másimovke raqymshylyq jasaýdan bas tartqany belgili boldy.