Másimovtiń saraıy aýktsıonnan shyǵaryldy

ASTANA. KAZINFORM – Qaıtarylǵan aktıvterdi basqarý kompanııasy Ulttyq qaýipsizdik komıtetiniń burynǵy orynbasary Kárim Másimovke tıesili delingen saraıdy elektrondy saýda josparynan shyǵarǵanyn málim etti. Buǵan deıin atalmysh múlik úsh ret elektrondy aýktsıonǵa shyǵarylyp, eshkim satyp almaǵan bolatyn.   

— 2025 jylǵy 18 sáýirde «Qaıtarylǵan aktıvterdi basqarý kompanııasy» JShS memlekettik múlik tiziliminiń veb-portalynda Astana qalasy, Nura aýdany, Qaraótkel shaǵyn aýdany, Ereımentaý kóshesi, 1-ǵımarat mekenjaıynda ornalasqan jertólesi bar turǵyn úıdi elektrondyq saýda arqyly satý týraly habarlandyrý jarııalady. Nysannyń bastapqy baǵasy 1 685 115 000 teńge.

Alaıda, atalǵan nysandy áleýmettik qajettilikterdi qanaǵattandyrý maqsatynda paıdalaný úshin Astana qalasy ákimdiginen Basqarýshy kompanııanyń atyna resmı suranys kelip tústi. Ótinishtiń áleýmettik mańyzdylyǵy men zańnama normalaryn eskere otyryp, nysan elektrondyq saýda josparyna engizilmeı alynyp tastaldy, — dep jazady kompanııanyń resmı saıty.

Habarlama mazmunyna qarap nysan Astananyń áleýmettik qajettiligine paıdalanýǵa beriledi dep topshylaýǵa bolady. Degenmen ınfraqurylymy erekshe ǵımarttardyń naqty qandaı salanyń áleýmettik qajettiligine qoldanysqa alynatyny áli belgisiz.

— Nysandy odan ári paıdalaný máselesi belgilengen tártippen jergilikti atqarýshy organnyń múddeleri eskerile otyryp sheshiledi, delingen resmı málimette.