Másimovtiń Astanadaǵy saraıy 1,8 mlrd teńgege satylymǵa shyǵaryldy
ASTANA. KAZINFORM – «Qaıtarylǵan aktıvterdi basqarý kompanııasy» JShS 2022 jylǵa qańtar tragedııasyna deıin Ulttyq qaýipsizdik komıtetiniń tóraǵasy bolǵan Kárim Másimovke tıesili delinetin úıdi satylymǵa shyǵardy.
25 aqpanda saǵat 10.00-de bastalatyn saýdaǵa resmı shyǵarylatyn jyljymaıtyn múliktiń bastapqy baǵasy 1,8 mlrd teńge dep kórsetilgen.
«Qaıtarylǵan aktıvterdi basqarý kompanııasy» JShS 2025 jylǵy 25 aqpanda saǵat 10:00-de E-Qazyna veb-platformasynda elektrondyq saýda ótkiziletinin habarlaıdy.
- Aýktsıon aıasynda Astana qalasy, Nura aýdany, Qaraótkel shaǵyn aýdany, Ereımentaý kóshesi, 1-qurylys mekenjaıynda ornalasqan jertólesi bar turǵyn úı satylymǵa qoıylady. Nysan barlyq qatysýshy úshin teń qoljetimdilikti qamtamasyz etetin ashyq jáne básekege qabiletti sharttarda júzege asyrylady, - dep jazylǵan kompanııanyń resmı saıtynda.
E-Qazyna veb-platformasynda jarııalanǵan qujattardan nysannyń Qaıtarylǵan aktıvterdi basqarý kompanııasyna 2024 jyldyń 19 qarashasynda berilgenin kórýge bolady.
Eske salsaq UQK burynǵy tóraǵasy Kárim Másimov 2022 jylǵy 8 qańtarda ustalǵan bolatyn.
UQK taratqan málimet boıynsha, Másimovtiń premer-mınıstr laýazymynda bolýy kezeńinde bıznes-qurylymnyń birinen astanada quny 2,5 mlrd teńge elıtalyq turǵyn úı men jer telimin alý faktisi boıynsha tergeý júrgizildi.