Máslıhattarǵa saılaýdyń aralas úlgisin engizý halyq suranysyna jaýap beredi - Aqmaral Álnazarova

NUR-SULTAN. QazAqparat - Búgin Prezıdent álemdegi kúrdeli geosaıası jaǵdaı aıasynda Qazaqstan halqyna Joldaýynda eldiń odan ári damýyn atap ótti. Oblystyq máslıhattyń 4-5-6 shaqyrylymdarynyń máslıhat depýtaty retindegi jumys edáýir tájirıbem bolǵandyqtan Joldaýda kóterilgen bastamalar qoǵamnyń, memlekettiń jáne birinshi kezekte Qazaqstan halqynyń qazirgi zamanǵy suranysyna saı keletinin nyq senimmen aıta alamyn, deıdi Senat depýtaty Aqmaral Álnazarova.

Senatordyń aıtýynsha, Prezıdenttiń shamadan tys ókilettikterden bas tartý bastamasy saıası jańarý baǵytyndaǵy taǵy bir qadam bolyp tabylady. Parlamenttiń rólin kúsheıtý – «kúshti Prezıdent, yqpaldy Parlament jáne esep beretin Úkimet» saıası júıe keskin-kelbetin iske asyrý bılik ınstıtýttary men jergilikti ókildi organdardyń tepe-teńdigin qamtamasyz etýge baǵyttalǵan.

Atap aıtqanda, máslıhattarǵa saılaýdyń aralas úlgisin engizý óte ýaqtyly jáne halyqtyń suranysyna jaýap beredi. Máslıhattardyń rólin arttyrý jáne olardyń táýelsizdigin qamtamasyz etý úshin máslıhat tóraǵasy laýazymy engiziledi. Bul da biraz ýaqyttan beri talqylanyp, búgingi qujatta kórinis tapqan másele bolyp tabylady. Jergilikti basqarý organdaryn qarjylandyrýdy keńeıtý jáne olardyń menshik bazasyn keńeıtý kózdelip otyr.

«Memleket basshysy jergilikti ózin-ózi basqarý organdarynyń jumys isteýiniń irgeli qaǵıdattaryn aıqyndaıtyn qujat bolyp tabylatyn Eýropalyq jergilikti ózin-ózi basqarý hartııasyn ratıfıkatsııalaý qajettigi týraly aıtty. Osy sharalardyń barlyǵy aǵymdaǵy jyldyń ortasyna deıin júzege asýy tıis. Bul bastamalar halyq pen bıliktiń arasyndaǵy senimdi arttyrýǵa septigin tızgizetini anyq», - deıdi Aqmaral Álnazarova.