Máslıhattardyń shyǵyp qalǵan depýtattarynyń ornyna saılaýdyń qorytyndylary shyǵaryldy - QR OSK
ASTANA. QazAqparat - 29 naýryzda elimizdiń 14 óńirindegi 59 saılaý okrýginde bolǵan máslıhattardyń shyǵyp qalǵan depýtattarynyń ornyna saılaýdyń qorytyndylary shyǵaryldy, dep habarlaıdy QR Ortalyq saılaý komıssııasynyń baspasóz qyzmetinen.
«Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń 101-baby 4-tarmaǵyna sáıkes 29 naýryzda respýblıkanyń 14 óńirinde 59 saılaý okrýginde máslıhattardyń shyǵyp qalǵan depýtattarynyń ornyna saılaý boldy.
Astana qalalyq máslıhatynyń 1 depýtaty, 8 oblystyq, 10 qalalyq jáne 40 aýdandyq máslıhattyń depýtattary saılandy», delingen habarlamada.
Saılaý naýqany barysynda barlyǵy 196 kandıdat usynyldy. Olardyń 60-yn saıası partııalar usyndy, 136-sy - ózin-ózi usynǵandar. Okrýgtik saılaý komıssııalary máslıhattar depýtattyǵyna kandıdat retinde 179 adamdy tirkedi. Jalpy respýblıka boıynsha saılaý bıýlletenderine 167 kandıdattyń tegi engizilidi. Bir depýtattyq mandatqa ortasha básekelestik shamamen 3 úmitkerdi qurady.
2015 jylǵy 29 naýryzda 252 saılaý ýchaskesinde ótken daýys berý boldy. Saılaýshylardyń kelýi 81,7%-dy qurady. Daýys berý barysy men daýystardy sanaý rásimin kandıdattardyń senim bildirgen adamdary, saıası partııalardyń, qoǵamdyq birlestikterdiń jáne BAQ ókilderi - barlyǵy 447 adam baıqaýdy júzege asyrdy.
Máslıhattardyń saılanǵan depýtattarynyń quramynda 43 er adam jáne 16 áıel adam boldy. Máslıhattardyń saılanǵan depýtattarynyń ortasha jasy - 45 jas. Olardyń 98,3%-nyń joǵary, 1,7%-nyń arnaýly orta bilimi bar. 28,8%-y memlekettik mekemelerde, uıymdarda jáne kásiporyndarda, 50,8%-y kommertsııalyq qurylymdarda jumys jasaıdy, 20,3%-y - saıası partııalar men ÚEU qyzmetkerleri. Jalpy, saılaý naýqany saılaý zańnamasy normalarynyń talaptaryna sáıkes ótti. Ortsaılaýkomǵa shaǵymdar men ótinishter kelip túsken joq.
