Máslıhattardyń 82%-y shaǵyn jáne orta bıznes salyǵyn tómendetýdi qoldady

ASTANA. KAZINFORM - Astana, Almaty jáne Shymkent qalalaryn qosa alǵanda 13 óńirdiń máslıhattary salyq mólsherlemesin tómendetýdi tolyq qoldady, dep habarlaıdy «AMANAT» partııasynyń resmı saıtty.

«AMANAT» partııasynyń hatshysy, Kásipkerlikti qoldaý jónindegi úılestirý keńesiniń teń tóraǵasy Eldar Jumaǵazıevtiń habarlaýynsha, búginde elimizdegi 210 aýdan men qalanyń 172-si (ıaǵnı 82%-y) bul quqyqty paıdalanyp úlgergen. Onyń ishinde 114 óńir (66%) salyqtyń eń tómengi mólsherlemesin – 2% deńgeıinde bekitse, qalǵandary – 3% mólsherlemesin belgiledi. Atap aıtqanda, Astana, Almaty jáne Shymkent qalalaryn qosa alǵanda 13 óńirdiń máslıhattary mólsherlemeni tómendetýdi tolyq qoldady.

-Eshbir óńir nemese aýdan salyq mólsherlemesin kótergen joq. Bul – óte mańyzdy sıgnal: óńirler kásipkerlerge qosymsha júk salmaı, kerisinshe, olardy belsendi túrde qoldaýǵa daıyn ekenin kórsetip otyr, – dedi ol.

Arnaıy salyq rejımi – shaǵyn jáne orta bıznes arasynda eń suranysqa ıe salyq salý formalarynyń biri. Óıtkeni ony ákimshilendirý ońaı jáne ol kásipkerdiń shyǵyndaryna tikeleı áser etedi. Sondyqtan salyq mólsherlemesiniń tipti bir paıyzǵa qysqarýy shaǵyn bıznestiń ekonomıkasyna eleýli ózgeris engizip, onyń turaqtylyǵyn arttyra alady.

-Máslıhattardyń aldynda ońaı mindet turǵan joq. Bir jaǵynan salyq bazasyn keńeıtý, ekinshi jaǵynan kásipkerlerge qoldaý kórsetý qajet boldy. Kóptegen óńirler bul mindetti sátti oryndap, ShOB-tyń suranysyna saı ońtaıly tepe-teńdik tapty, – dedi partııa hatshysy.

Eldar Jumaǵazıev elimizdegi shaǵyn jáne orta bıznes sýbektileriniń shamamen 18%-y shoǵyrlanǵan Almaty qalasyn mysal retinde keltirdi. Taldaý nátıjesinde máslıhat 3% mólsherleme belgileýdi usyndy, bul sheshim 200 myńǵa jýyq kásipkerge tikeleı áser etedi. Mundaı qadam qalanyń iskerlik belsendiligin arttyryp, kóleńkeli bıznesti ashyq júıege shyǵaryp, saıyp kelgende, salyq bazasyn qysqartpaı, kerisinshe ulǵaıtady.

Aıta keteıik, jańa Salyq kodeksine sáıkes, maslıhattar jyl saıyn 1 jeltoqsanǵa deıin arnaıy salyq rejımi mólsherlemelerin retteýge quqyly. 

-Qazir kóptegen óńirler jeńildetilgen salyq mólsherlemesine kóship jatyr, bul shaǵyn jáne orta bıznesti qoldaýǵa baǵyttalǵan mańyzdy qadam bolyp sanalady,-delingen habarlamada. 

Osyǵan deıin salyq tapsyrý formalary 30% qysqaratyny týraly jazdyq.