Máslıhattardan shyǵyp qalǵan depýtattardyń ornyna saılaýǵa kandıdattardy usyný aıaqtaldy - OSK
«Saılaý naýqanynyń barysynda 101 kandıdat usynyldy, olardyń 31-in saıası partııalar, al 70-si ózin-ózi usyndy. Usynylǵan kandıdattardyń 83-i (82,2 %) er adam jáne 18-i (17,8 %) áıel adam. 31 kandıdat Qazaqstan Respýblıkasynyń saıası partııalarynyń múshesi, 50-i partııa qatarynda joq, 20-sy partııa qatarynda ekendigin kórsetpegen. Usynylǵan kandıdattardyń ishinde 6 ulttyń ókili bar. Ortasha jas - 41. 84 (83,1 %) kandıdattyń joǵary bilimi, 12-siniń (11,9 %) orta kásiptik bilimi jáne 5-eýiniń (5 %) orta bilimi bar. Kandıdattardyń 43,6 paıyzy memlekettik mekemelerde, uıymdarda jáne kásiporyndarda, 41,6 paıyzy kommertsııalyq qurylymdarda jumys jasaıdy. 12,8 paıyzy - saıası partııalar men ÚEU-nyń qyzmetkerleri, 2 paıyzy jumyspen qamtýdyń ózge toptarynyń ókilderi», - delingen taratylǵan aqparatta.
Komıssııa málimetinshe, qazirgi ýaqytta máslıhattardyń shyǵyp qalǵan depýtattarynyń ornyna kandıdattardy tirkeý jalǵasýda. Aqtóbe, Shyǵys Qazaqstan, Qaraǵandy, Qostanaı, Pavlodar, Soltústik Qazaqstan jáne Ońtústik Qazaqstan oblystarynda tirkeý 4 qazanda, al Almaty, Jambyl jáne Batys Qazaqstan oblystarynda 5 qazanda aıaqtalady.
2016 jylǵy 1 qazandaǵy jaǵdaı boıynsha okrýgtik saılaý komıssııalary 87 kandıdatty tirkedi. Tirkeý merzimi aıaqtalǵan soń tirkelgen barlyq kandıdattar 28 qazan kúngi 24.00 saǵatqa deıin júretin saılaýaldy úgitke kirisedi.
15 qazannan bastap saılaý bolatyn okrýgterdiń saılaýshylary ýchaskelik saılaý komıssııalarynyń úı-jaılarynda saılaýshylar tizimderimen tanysyp, olardaǵy ózi týraly málimetterdi tekserip jáne onda jiberilgen qatelikterdi anyqtaǵan jaǵdaıda, túzetýler engize alady.
«Saılaý naýqany qajetti qarjylyq jáne materıaldyq-tehnıkalyq resýrstarmen qamtamasyz etilgen jáne saılaý zańnamasynyń normalaryna sáıkes ótýde. Ortalyq saılaý komıssııasyna shaǵymdar men ótinishter kelip túsken joq», - dep habarlady OSK-den.
