Máslıhattardaǵy «Nur Otan» depýtattarynyń reıtıngi kópshilikke jarııa etilmek

NUR-SULTAN. QazAqparat – Máslıhattardaǵy «Nur Otan» depýtattarynyń reıtıng nátıjesin jurtshylyqqa jarııa etý kerek. Bul týraly atalǵan partııanyń atqarýshy hatshysy Ashat Oralov aıtty, dep habarlaıdy QazAqparat tilshisi.

«Partııanyń jumysy barynsha ashyq bolýy tıis dep sanaımyz. Búgingi tańdaǵy qoǵamnyń asa ózekti suranystarynyń biri – partııanyń ashyqtyǵy jáne halyqqa jaqyn bolýy», - dedi ol partııanyń kezekten tys sezinde.

Onyń atap ótýinshe, pılottyq joba retinde máslıhattardaǵy «Nur Otan» depýtattarynyń reıtıng júıesi tolyqtaı synaqtan ótti.

«Onyń nátıjesin jurtshylyqqa jarııa etýdi usynamyz. Munymen qatar, partııalyq mobıldi qosymsha iske qosylady. Onda azamattar partııanyń jumysy týraly jedel aqparat alyp, qoǵamdyq mańyzdy máselelerge baılanysty túrli saýalnamalarǵa qatysyp, ótinish pen usynys-tilekterin qaldyra alady», - dedi Ashat Oralov.