Máslıhattar jalpyulttyq mindetterdi júzege asyrýǵa úles qosýy kerek – Qasym-Jomart Toqaev

ASTANA. KAZINFORM – Reformalardy óńirlerde iske asyrýda máslıhattardyń orny aıryqsha. Bul týraly Memleket basshysy Qasym-Jomart Toqaev elordada máslıhat depýtattarynyń ІІ respýblıkalyq forýmynda aıtty.

«Byltyr meniń tóraǵalyǵymmen ótken elimizdiń áleýmettik-ekonomıkalyq damýyna arnalǵan keńeıtilgen keńeske kóptegen depýtattar qatysty. Mundaı jıyn aldaǵy ýaqytta da ótip turady. Sebebi reformalardy óńirlerde iske asyrýda máslıhattardyń orny aıryqsha. Máslıhattardyń memlekettik jáne qoǵamdyq mindetterdi júzege asyrýǵa etene aralasýy, ózderi túrli bastama kóterýi mańyzdy», - dedi Prezıdent. 

Memleket basshysy Amanat partııasynyń qoǵamdaǵy ózekti máselelerdi sheshýge baǵyttalǵan jobalaryn erekshe atap ótti.

«Sondyqtan jastarǵa, áıelderge, kásipkerlerge, zeınetkerlerge, erekshe qajettilikteri bar adamdarǵa qoldaý kórsetý, halyqtyń qaryz júktemesin azaıtý, aýyl turǵyndarynyń kirisin arttyrý, paıdalanylmaı jatqan jáne zańsyz berilgen jerlerdi qaıtarý, ekologııalyq, qarjylyq saýattylyqty jetildirý, qoǵamdaǵy oqý mádenıetin qalyptastyrý sııaqty jobalar – aıryqsha nazar aýdarýdy qajet etetin ózekti máseleler. Men Úkimetke «Qaryzsyz qoǵam» jáne «Aýyl amanaty» sekildi partııalyq jobalardyń aýqymyn keńeıtýge kómektesýdi tapsyrdym.

Memleket adal eńbegimen turmysyn jaqsartýǵa daıyn jandarǵa árqashan qoldaý kórsetedi. Bul «Adal eńbek – Adal tabys» qaǵıdasyna tolyq sáıkes keledi jáne Ádiletti Qazaqstan qurýdyń negizgi faktorlarynyń biri. Sondyqtan kelesi jyldy Jumysshy mamandyqtar jyly dep jarııaladym. Osy arqyly qoǵamda eńbek qundylyǵy men kásibı biliktiliktiń ornyǵýyna yqpal etemiz dep senemin», - dedi Qasym-Jomart Toqaev.