Máslıhattar merziminen buryn taratylady: ákimdikterdiń jumysy toqtaı ma
ASTANA.KAZINFORM — Ulttyq ekonomıka mınıstrligi Kazinform agenttiginiń resmı saýalyna bergen jaýabynda máslıhattardyń ókilettigin merziminen buryn toqtatý ákimderdiń jáne jergilikti atqarýshy organdardyń jumysyna áser etpeıtinin aıtty.
Sonymen qatar mınıstrlik máslıhattardyń ókilettigin merziminen buryn toqtatý jergilikti atqarýshy organdardyń da jumysy toqtaıdy degendi bildirmeıdi dep túsindirdi.
— Máslıhattardyń ókilettigin merziminen buryn toqtatý ákimder men jergilikti atqarýshy organdardyń ókilettikterin toqtatýǵa negiz bolmaıdy. Olar Qazaqstan Respýblıkasynyń zańnamasyna sáıkes óz mindetterin atqarýdy jalǵastyrdy. Osylaısha, basqarý júıesiniń úzdiksiz jumys isteýi jáne tıisti aýmaqtardyń áleýmettik-ekonomıkalyq damýyna qatysty kúndelikti máselelerdiń sheshilýi qamtamasyz etiledi, — dep habarlady Ulttyq ekonomıka mınıstrligi.
Sondaı-aq «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zańnyń 25-babyna sáıkes, máslıhat depýtattarynyń ókilettigi merziminen buryn toqtatylyp, jańa quram saılanǵan jaǵdaıda da máslıhat apparatynyń qyzmetkerleri óz jumysyn jalǵastyrady.
Vedomstvo málimetinshe, Ulttyq ekonomıka mınıstrligi óz quzyreti sheginde jergilikti atqarýshy organdarmen birlesip jumys isteýdi jalǵastyrady. Bul óńirlerdiń áleýmettik-ekonomıkalyq damýynyń turaqtylyǵyn qamtamasyz etý máselelerin de qamtıdy.
Al máslıhat depýtattarynyń saılaýyn uıymdastyrý jáne ony tikeleı ótkizý mindeti Ortalyq saılaý komıssııasy men aýmaqtyq saılaý komıssııalaryna júktelgen.
Osyǵan baılanysty mınıstrlik kezekten tys saılaýdy uıymdastyrý jáne ótkizý máseleleri boıynsha ákimdikterge arnaıy usynymdar nemese qosymsha túsindirmeler jiberýdiń qajeti joq ekenin aıtty.
Aıta keteıik, máslıhat saılaýynda 12 mıllıonnan astam qazaqstandyq daýys bere alady.
Sonyme qatar elimizde máslıhat saılaýy ótetin kún belgilendi.
