Máslıhat saılaýynda 12 mıllıonnan astam qazaqstandyq daýys bere alady
ASTANA. KAZINFORM — Qazaqstanda máslıhat depýtattarynyń kezekten tys saılaýynda 12 mıllıonnan astam azamat daýys bere alady. Bul týraly Ortalyq saılaý komıssııasynyń múshesi Azamat Aımanqulov brıfıngte málimdedi.
Onyń aıtýynsha, aýmaqtyq saılaý komıssııalary daýys berýge 20 kún qalǵanda ákimdikterden saılaýshylar tizimin alady.
— Bıyl saılaýǵa 12 mıllıonnan astam saılaýshy qatysady dep josparlanyp otyr. Kúntizbelik josparǵa sáıkes, daýys berýge 20 kún qalǵanda aýmaqtyq saılaý komıssııalary ákimdikterden saılaýshylar tizimin alady. Sodan keıin tizimder túpkilikti qalyptastyrylady, — dedi Azamat Aımanqulov.
Eske sala ketsek, 29 qarashada Qazaqstanda kezekten tys máslıhat saılaýy ótedi.
Buǵan deıin Ortalyq saılaý komıssııasy kandıdattardyń qashan tirkelip, úgit-nasıhat júrgize alatynyn jarııalaǵan edi.
Máslıhat depýtattyǵyna kandıdattar saılaýǵa qatysý úshin 425 myń teńge kóleminde saılaý jarnasyn tóleýi kerek.
Sonymen birge, OSK 7 saıası partııanyń saılaýǵa qatysýyna ruqsat berdi.
