Máslıhat saılaýyna qandaı partııalar qatysady
ASTANA. KAZINFORM — Qazaqstanda máslıhat depýtattarynyń kezekten tys saılaýyna 7 saıası partııa qatysatyn boldy. Bul týraly Ortalyq saılaý komıssııasynyń otyrysynda belgili boldy.
OSK músheleri tıisti qaýlylar qabyldap, saılaýǵa qatysýǵa ruqsat alǵan partııalardyń tizimin bekitti. Olardyń qatarynda «Aq jol» demokratııalyq partııasy, «Aýyl» partııasy, «Ádilet» partııasy, Jalpyulttyq sotsıal-demokratııalyq partııa, «Baıtaq» Qazaqstan jasyldar partııasy, Qazaqstan Halyq partııasy jáne «Respublica» partııasy bar.
Sonymen birge, OSK tóraǵasy Nurlan Ábdirov «AMANAT» partııasynan resmı hat túskenin habarlady. Qujatta partııanyń máslıhat depýtattarynyń kezekten tys saılaýyna qatyspaıtyny aıtylǵan.
Brıfıng barysynda Nurlan Ábdirovten «AMANAT» partııasynyń saılaýǵa qatyspaý sebebi suraldy. Onyń aıtýynsha, ár saıası partııa óz betinshe sheshim qabyldaıdy. «AMANAT» partııasy Quryltaı depýtattarynyń saılaýy kezinde de osyndaı ustanym bildirgen.
— Partııanyń «Ádilet» partııasyna qosylý týraly sheshimine baılanysty saılaýǵa qatyspaıtyny jóninde hat alǵan edik. Búgin tańerteń de osyndaı hat kelip tústi. Bul — partııanyń óz sheshimi, biz ony eskeremiz, — dedi OSK tóraǵasy.
Eske sala ketsek, 29 qarashada Qazaqstanda kezekten tys máslıhat saılaýy ótedi.
Buǵan deıin Ortalyq saılaý komıssııasy kandıdattardyń qashan tirkelip, úgit-nasıhat júrgize alatynyn jarııalaǵan edi.
