Máslıhat saılaýyn ótkizýge Úkimet rezervinen qarjy bólinedi
ASTANA. KAZINFORM — Qazaqstanda máslıhat depýtattarynyń kezekten tys saılaýyn ótkizýge qajetti qarajat Úkimet rezervinen bólinedi. Sebebi bıylǵy bıýdjette osy saılaý naýqanyna qarjy qarastyrylmaǵan. Bul týraly Ortalyq saılaý komıssııasynyń múshesi Mıhaıl Bortnık málimdedi.
Onyń aıtýynsha, saılaýǵa bólinetin qarajattyń naqty kólemin Úkimet aýmaqtyq saılaý komıssııalarynyń ótinimderi men daýys berýdi uıymdastyrýǵa jumsalatyn naqty shyǵyndardy eskere otyryp aıqyndaıdy.
— Bul saılaý kezekten tys ótkizilýine baılanysty oǵan qajetti qarajat Qazaqstannyń bıylǵy bıýdjetinde qarastyrylmaǵan. Sondyqtan saılaý shyǵyndary Úkimet rezervinen qarjylandyrylady, — dedi Mıhaıl Bortnık OSK otyrysynan keıingi brıfıngte.
Aldyn ala esep boıynsha, qarajattyń basym bóligi saılaý komıssııalary músheleriniń eńbekaqysyn tóleýge jumsalady. Bul maqsatqa saılaýdyń jalpy bıýdjetiniń shamamen 75-80 paıyzy baǵyttalmaq. Eńbekaqy 86 myńnan astam komıssııa múshesine tólenedi.
OSK múshesi saılaýǵa jumsalatyn shyǵyn kólemi jumysqa tartylatyn saılaý komıssııalarynyń sanyna, saılaý naýqanynyń uzaqtyǵyna jáne ony uıymdastyrýǵa qatysty ózge de kórsetkishterge baılanysty ekenin atap ótti.
Aldaǵy saılaý naýqanynyń birqatar ereksheligi bar. Atap aıtqanda, qosymsha 3 022 okrýgtik saılaý komıssııasy jumysqa tartylyp, quramyna taǵy 15 110 adam kiredi. Olardyń eńbegine de qosymsha qarjy qajet.
Budan bólek, birmandattyq saılaý okrýgteri boıynsha máslıhat depýtattyǵyna túsetin kandıdattardy memlekettik qarjylandyrýǵa qarjy qarastyrylady. Zańnamaǵa sáıkes, tirkelgen kandıdattardyń saılaýaldy úgit júrgizýine memleket qarjy bóledi. Onyń naqty kólemin Ortalyq saılaý komıssııasy jeke aıqyndaıdy.
Saılaý bıýlletenderin basyp shyǵarýǵa da qosymsha shyǵyn jumsalady. Quryltaı saılaýynan aıyrmashylyǵy, bul joly oblystyq qalalyq jáne aýdandyq máslıhattardyń depýtattary saılanady. Sondyqtan bıýlletenderdiń sany men olardy basyp shyǵarý shyǵyny ár óńirdegi daýys berý erekshelikterine qaraı esepteledi.
M. Bortnıktiń aıtýynsha, bıýdjetti josparlaǵanda aldyńǵy saılaý naýqanymen salystyrǵanda saılaýshylar sanynyń artqany da eskeriledi.
— Ortalyq jáne aýmaqtyq saılaý komıssııalary bólingen qarajatty únemdi jumdaýǵa ári ony maqsatty paıdalanýǵa basymdyq berip otyr. Óıtkeni saılaý shyǵyndary Úkimet rezervinen bólinetin memlekettik qarajat esebinen óteledi, — dep túıindedi ol.
Eske sala ketsek, 29 qarashada Qazaqstanda kezekten tys máslıhat saılaýy ótedi.
Buǵan deıin Ortalyq saılaý komıssııasy kandıdattardyń qashan tirkelip, úgit-nasıhat júrgize alatynyn jarııalaǵan edi.
Máslıhat depýtattyǵyna kandıdattar saılaýǵa qatysý úshin 425 myń teńge kóleminde saılaý jarnasyn tóleýi kerek.
