Máslıhat saılaýyn ótkizýge qansha qarajat bólinedi
ASTANA. KAZINFORM — 29 qarashada ótetin máslıhat saılaýyn uıymdastyrýǵa jáne ótkizýge 35,8 mlrd teńge qarastyrylady. Bul týraly OSK múshesi Mıhaıl Bortnık málimdedi.
Onyń aıtýynsha, saılaýdy ótkizýge arnalǵan bıýdjet kólemi Qarjy mınıstrligimen jáne Ulttyq ekonomıka mınıstrligimen kelisilgen.
— Atap aıtqanda, aldaǵy máslıhat saılaýynyń aýqymy bıyl tamyz aıynda ótken Quryltaı saılaýymen shamalas. Sonymen qatar, saılaý protsesine qosymsha 3 022 okrýgtik saılaý komıssııasy tartylady. Bul — 15 110 saılaý komıssııasynyń múshesi, — dedi Mıhaıl Bortnık.
Onyń sózinshe, burynǵy saılaýlardaǵydaı, bólingen qarajattyń basym bóligi komıssııa músheleriniń eńbekaqysyn tóleýge baǵyttalady. Atap aıtqanda, jalpy bıýdjettiń shamamen 70 paıyzy osy maqsatqa jumsalmaq.
Budan bólek, 3 113 birmandatty okrýgte saılaý ótkizýge baılanysty qosymsha shyǵyndar qarastyrylǵan.
Sondaı-aq kandıdattardy tirkeý jumystaryna memleket tarapynan qoldaý kórsetiledi.
— Osynyń barlyǵyn eskere otyryp, saılaýdy uıymdastyrý men ótkizýge qajetti jalpy qarajat kólemi 35 mlrd 800 mln teńgeni qurady, — dep atap ótti ol.
Aıta keteıik, máslıhat saılaýyna Qazaqstanda 10 971 kandıdat tirkeldi.
