Máslıhat saılaýy: saılaý aldyndaǵy úgit 1 qarashada bastaldy
ASTANA. KAZINFORM- Búgin Ortalyq saılaý komıssııasynda saılaý naýqany kezeńinde saılaý aldyndaǵy úgitti júrgizýge qatysty zańnama normalary túsindirildi. OSK múshesi Lázzat Súıindik úgit kezeńiniń merzimderin atap ótti.
Lázzat Súıindiktiń aıtýynsha, osy saılaý naýqany aıasynda saılaý aldyndaǵy úgit 1 qarasha kúni saǵat 18:00–den keıin bastalyp, 28 qarasha kúni saǵat 00:00–de aıaqtalady.
Daýys berý aldyndaǵy kún, ıaǵnı 28 qarasha, tynyshtyq kúni bolyp belgilengen. Bul kúni saılaý aldyndaǵy úgit júrgizýge tyıym salynady.
Sondaı-aq Ortalyq saılaý komıssııasy daýys berý kúni toltyrylǵan bıýlletendi foto jáne (nemese) beınetúsirilimge túsirýge jáne ony taratýǵa tyıym salynatynyn eske saldy.
Ózderiniń ınternet-resýrstary men onlaın-platformalardaǵy akkaýnttaryn paıdalanatyn saıası partııalar men kandıdattarǵa úgit materıaldaryn shart negizinde ornalastyrý týraly talap qoldanylmaıtyny túsindirildi.
Budan bólek, Qazaqstannan tys jerde úgit materıaldaryn daıyndaýǵa, anonımdi úgit materıaldaryn taratýǵa, sondaı-aq aǵymdaǵy saılaý naýqany úshin ázirlenbegen materıaldardy paıdalanýǵa tyıym salynatyny aıtyldy.
— Daýys berý kúni jáne onyń aldyndaǵy kúni kez kelgen saılaý aldyndaǵy úgitke tyıym salynatynyn eske salǵym keledi. Buǵan deıin ornalastyrylǵan úgittik baspa materıaldary burynǵy oryndarynda saqtalýy múmkin. Internet jelisinde ornalastyrylǵan úgit materıaldary da burynǵy oryndarynda qala beredi. Alaıda olardy ınternet-resýrstardyń basty betterine shyǵarýǵa jol berilmeıdi. Daýys berý kúniniń aldyndaǵy bes kún ishinde jáne daýys berý kúni buqaralyq aqparat quraldarynda jáne onlaın-platformalarda qoǵamdyq pikirge saýal salý nátıjelerin, saılaý qorytyndylarynyń boljamdaryn, saılaýǵa baılanysty ózge de zertteýlerdi, sondaı-aq saıası partııalardy qoldaý maqsatyndaǵy daýys berý nátıjelerin jarııalaýǵa jol berilmeıdi, — dep atap ótti Lázzat Súıindik.
Aıta keteıik, áslıhattar merziminen buryn taratylatynyn jazǵanbyz.
