Máslıhat saılaýy: Qazaqstanda 10 971 kandıdat tirkeldi
ASTANA. KAZINFORM- Qazaqstan Respýblıkasy Ortalyq saılaý komıssııasynda QR máslıhattary depýtattyǵyna kandıdattardy tirkeý qorytyndylary shyǵaryldy.
Otyrys barysynda aýmaqtyq saılaý komıssııalary kandıdattardy tirkeý nátıjelerin tanystyrdy.
1 qarasha kúni saǵat 18:00–degi jaǵdaı boıynsha elimiz boıynsha 10 971 kandıdat tirkelgen.
3 113 birmandatty aýmaqtyq saılaý okrýginde 9 752 kandıdat tirkeldi. Osylaısha, orta eseppen bir depýtattyq mandatqa úsh adam úmitker bolyp otyr.
Elimizdiń 20 óńirinde partııalyq tizimder boıynsha 99 tizim tirkelip, olardyń quramyna 1 219 kandıdat engizildi.
Otyrys barysynda usynylǵan málimetterge sáıkes, kvotalyq sanattarǵa jatatyn kandıdattardyń sany 527 adam nemese 43,2%.
Astana qalasy
Astanada 17 birmandatty saılaý okrýgi boıynsha 83 adam óz kandıdatýrasyn usyndy. Olardyń beseýi kandıdatýralaryn qaıtaryp aldy, taǵy 10 adam qajetti qujattardyń barlyǵyn usynbaǵan nemese saılaý jarnasyn tólemegen.
Jeti partııa óz tizimderin usynyp, oǵan 101 kandıdat engizildi.
Almaty qalasy
Almatyda 21 birmandatty aýmaqtyq saılaý okrýgi boıynsha 111 adam kandıdatýrasyn usyndy.
Olardyń 12-si kandıdatýralaryn qaıtaryp aldy. Bir kandıdat talaptarǵa sáıkes kelmeýine baılanysty tirkeýden bas tartyldy, taǵy 15 kandıdat saılaý jarnasyn tólemegeni úshin tirkelmedi.
Nátıjesinde 83 kandıdat qaldy.
Alty partııa óz tizimderin usynyp, oǵan 121 kandıdat engizildi. Olardyń ekeýi kandıdatýralaryn qaıtaryp aldy.
Shymkent qalasy
Shymkentte barlyǵy 52 kandıdat usynyldy. Olardyń toǵyzy kandıdatýralaryn qaıtaryp aldy, bir kandıdat saılaýaldy úgit júrgizý tártibin buzǵany úshin, taǵy úsheýi saılaý jarnasyn tólemegeni úshin kandıdattyqtan alyndy.
Bes partııa óz tizimderine 58 kandıdatty engizdi.
Aıta keteıik, máslıhattar merziminen buryn taratylatynyn jazǵanbyz.
