Máslıhat saılaýy: Kandıdattar qashan tirkelip, úgit júrgize alady
ASTANA. KAZINFORM — Ortalyq saılaý komıssııasy 29 qarashaǵa belgilengen máslıhat depýtattarynyń kezekten tys saılaýyn ázirleý men ótkizý jónindegi negizgi is-sharalardyń kúntizbelik josparyn bekitti.
Josparǵa sáıkes, usyný jáne ózin-ózi usyný kezeńi 14 qazanda bastalady jáne 27 qazanda saǵat 18:00–de aıaqtalady.
Partııalyq tizimder jáne kandıdattardy tirkeý kezeńi 1 qarashada saǵat 18:00–de aıaqtalady.
— QR Saılaý týraly zańynyń 27-baby 2-tarmaǵyna sáıkes, saılaý aldyndaǵy úgit partııalyq tizimder jáne kandıdattardy tirkeý kezeńi aıaqtalǵan sátte bastalady. Úgit-nasıhat kezeńi saılaýǵa bir kún qalǵanda saǵat 00:00–de aıaqtalady. ıAǵnı, 1 qarasha kúni saǵat 18:00–keıin bastalyp, 28 qarashada saǵat 00:00–ge deıin júrgiziledi, — dedi OSK tóraǵasynyń orynbasary Muhtar Erman.
Saılaý ýchaskeleriniń shekaralaryn jáne ýchaskelik komıssııalardyń quramdaryn jarııalaý merzimi saılaý taǵaıyndalǵannan keıin 15 kúnnen keshiktirmeı, ıaǵnı 28 qazanǵa deıin anyqtalýy kerek.
Jergilikti atqarýshy organdar saılaýshylardyń tizimderin daýys berý bastalardan 20 kún buryn — 9 qarashada saılaý ýchaskelerine jiberedi.
Azamattardyń turǵylyqty jeri boıynsha qurylǵan saılaý ýchaskeleri boıynsha saılaýshylardyń tizimderi saılaýshylarǵa ózderi týraly derektermen tanysý úshin daýys berý kúninen 15 kún buryn, ıaǵnı 13 qarashadan bastap usynylady.
2026 jylǵy 28 qarasha — Tynyshtyq kúni.
— Daýys berý saılaý kúni saǵat 7:00–den saǵat 20:00–ǵa deıin ótedi. Aýmaqtyq saılaý komıssııalar daýys berýdi bastaıtyn jáne aıaqtaıtyn basqa ýaqyt belgileýge quqyly. Bul jaǵdaıda daýys berýdi 6:00–den erte bastaýǵa jáne saǵat 22:00–den kesh aıaqtaýǵa bolmaıdy, — dep túsindirdi OSK ókili.
Máslıhattar depýtattarynyń saılaý qorytyndylary 5 kún merzimde anyqtalady.
Eske sala ketsek, 29 qarashada Qazaqstanda kezekten tys máslıhat saılaýy ótedi.
Keshe Memleket basshysy barlyq deńgeıdegi máslıhattardyń ókilettigin merziminen buryn toqtatý týraly Jarlyqqa qol qoıdy.
