Máslıhat: ınfraqurylymdyq jobalarda qarjylyq ashyqtyqty kúsheıtý qajet
ASTANA. KAZINFORM — Memlekettik-jekeshelik áriptestik tetigi ınfraqurylymdy damytý kezinde bıýdjetke túsetin júktemeni azaıtyp, áleýmettik jáne bilim berý qyzmetteriniń qoljetimdiligin arttyrýǵa múmkindik beredi. Bul týraly Astana qalasy máslıhatynyń bıýdjet, ekonomıka, ónerkásip jáne kásipkerlik máseleleri jónindegi turaqty komıssııasynyń hatshysy Madına Ájikenova máslıhat otyrysynda aıtty.
Onyń aıtýynsha, mundaı jobalardy iske asyrý barysynda birqatar máselege erekshe nazar aýdarý qajet.
Birinshiden, memleket qabyldaıtyn mindettemelerdiń basym bóligi uzaq merzimdi sıpatqa ıe. Sondyqtan qarjylyq esepteýlerdiń naqtylyǵy men ashyqtyǵyn qamtamasyz etý mańyzdy.
Ekinshiden, jobalardy ázirleý barysynda keıbir sheshimderdiń tolyq pysyqtalmaýy jáne kelisý rásimderiniń uzaqqa sozylýy jobalardy iske asyrý merzimine keri áserin tıgizedi.
Sondaı-aq spıker jeke áriptesterdi irikteý kezinde qoıylatyn talaptar men táýekelderdi jan-jaqty baǵalaý qajettigin atap ótti. Onyń sózinshe, bul máseleler jetkilikti deńgeıde qarastyrylmasa, mindettemelerdiń bir bóligi memleketke júktelip, seriktestiktiń tıimdiligi tómendeýi múmkin.
Madına Ájikenova sońǵy jyldary ınfraqurylymdyq jáne tsıfrlyq jobalarǵa basymdyq berilip kele jatqanymen, qoldanystaǵy jobalar portfeliniń edáýir bóligi áli de áleýmettik salaǵa tıesili ekenin aıtty. Onyń pikirinshe, mundaı jobalar bilim berý nysandarynyń qoljetimdiligin arttyryp, jańa oqý oryndaryn ashýǵa jáne áleýmettik ınfraqurylymdy damytýǵa múmkindik bergenimen, olardyń ekonomıkalyq qaıtarymy óndiristik jáne ınfraqurylymdyq jobalarmen salystyrǵanda tómen.
— ıAǵnı olardyń ınvestıtsııa tartýǵa, jańa jumys oryndaryn qurýǵa, bıýdjet kiristerin ulǵaıtýǵa jáne qalanyń ekonomıkalyq damýyna qosatyn úlesi shekteýli, — dedi ol.
Osy rette komıssııa hatshysy qalalyq ınfraqurylymdy ıntellektýaldy basqarý júıesi jobasyn mysalǵa keltirdi. Onyń aıtýynsha, atalǵan joba tikeleı bıýdjet qarajatyn bólýdi talap etpeı, shamamen 16,5 mlrd teńge kóleminde bıýdjetke túsim qamtamasyz etip otyr. Osyǵan baılanysty jobany paıdalanýǵa berý merziminiń sozylyp ketýine jol bermeý qajet.
Sóz sońynda Madına Ájikenova jobalaý kezeńindegi daıyndyq sapasyn arttyrýdy, jeke áriptesterdi irikteý jáne baǵalaý tetikterin jetildirýdi, qarjylyq esepteýler men uzaq merzimdi mindettemelerge baqylaýdy kúsheıtýdi, ekonomıkalyq tıimdi jobalardyń úlesin kóbeıtýdi, sondaı-aq saraptama júrgizý jáne kelisý rásimderin jedeldetýdi usyndy.
Aıta keteıik, Astana álemdegi eń qarqyndy damyp jatqan bas shahardyń birine aınaldy. Keıingi bes jylda elordadaǵy turǵyn sany jarty mıllıonǵa kóbeıgen, qonys aýdarýǵa nıetti azamattardyń da qatary artýda. Alaıda qala ınfraqurylymy mundaı demografııalyq ósimge qanshalyqty daıyn ekenin jazǵanbyz.
