Máslıhat depýtaty: Tótenshe jaǵdaı merzimin uzartý – qajettilikten týyndady
ALMATY. QazAqparat – Memleket basshysy Qasym-Jomart Toqaevtyń elimizde tótenshe jaǵdaı rejımin 11 mamyrǵa deıin sozý sheshimi qoǵamdyq qajettilikten týyndap otyr. Almaty qalasy máslıhatynyń depýtaty Nurııa Nııazova osyndaı pikirimen bólisti, dep habarlaıdy QazAqparat tilshisi.
«QR Prezıdenti Qasym-Jomart Toqaevtyń tótenshe jaǵdaı rejımin uzartýǵa qatysty málimdemesi qajettilikten týyndap otyr. Memleket basshysy bul sheshimdi elep-ekshep, naqty zertteýlerden keıin qabyldaǵanyna kúmán joq. Biz osy ýaqytqa deıin karantın rejımin buzbaı keldik. Endi osy atqarylǵan jumysty bekitý úshin, zaıa ketirmeý úshin sońǵy 2 apta karantınde otyrýymyz kerek. Qazir qalada ekonomıkalyq ahýaldy turaqtandyrý úshin iri kásiporyndar iske qosyla bastaǵany belgili. Memleket bul turǵyda barlyq sanıtarlyq normalardyń saqtalýyn qamtamasyz etetin bolady», - dedi Nurııa Nııazova.
Máslıhat depýtaty azamattardy sabyrlyqqa shaqyrdy.
«Qazir – Ramazan aıy. Barlyq turǵyndarǵa sabyrlyq saqtaýǵa keńes beremin. Dárigerler, áskerıler, muǵalimder sııaqty óz mindetin qaltqysyz atqaryp jatqan mamandarǵa alǵysym sheksiz. Memleket te birinshi kezekke azamattardyń qaýipsizdigi men densaýlyǵyn qoıyp otyrǵany anyq. Muny kórsetilip jatqan áleýmettik kómekten kórýge bolady», - dedi N.Nııazova.
Eske sala ketsek, QR Prezıdenti Qasym-Jomart Toqaev búgin málimdeme jasap, tótenshe jaǵdaı rejımi bıylǵy 11 mamyrǵa deıin uzartylatynyn aıtty.
Sonymen qatar 1 mamyrdan bastap elorda men Almaty qalalary arasynda áýe reısteri ashylatyn bolady.
