Máslıhat depýtaty ornyn bosatty: Bıznesti tańdadym
ALMATY. QazAqparat - Almatyda Jetisý aýdanynyń №25 okrýgi boıynsha Máslıhat depýtaty Erlan Stambekov óziniń depýtattyq ókilettigin toqtatatynyn málimdedi, dep habarlaıdy QazAqparat tilshisi.
Halyq qalaýlysy Erlan Stambekov Feısbýktegi paraqshasynda bıznesinde jańa jobalardyń paıda bolýyna baılanysty depýtattyqtan ketetinin málimdegen.
«Men ózimniń seriktesterimmen birige otyryp, birneshe halyqaralyq jobany júzege asyrýym kerek. Árıne, oǵan kóp kúsh jumsaý kerek. Uzaq ýaqytqa issaparǵa ketý kerek bolady. Ornymda bir kún bar, bir kún joq bolsam, ol meniń depýtattyǵyma syn emes pe? Maǵan senip daýys bergen azamattardyń senimin aqtamaǵanym bolady. Osyǵan baılanysty naqty sheshim qabyldadym. Eger aıaqsyz qaldyrǵan dúnıelerim bolsa, meniń ornyma saılanatyn depýtatqa qaldyryp ketýge tyrysamyn. Almaty qalasy máslıhatynyń ujymyna, birge jumys jasaǵan áriptesterime maǵan bergen úlken tájirıbeleri úshin alǵys bildiremin», - dedi ol jazbasynda.
Al qalalyq ortalyq saılaý komıssııasy tóraıymynyń orynbasary Aıgúl Hasanova Erlan Stambekovten eshqandaı ótinish túspegenin aıtty.
«Dál qazir Stambekovten eshqandaı aryz túspedi. Ol kisi óziniń resmı ótinishin ótkizgen soń, belgili bir sharalardy ótkizemiz. Sodan soń qosymsha saılaý týraly másele qarastyrylady», - dedi Aıgúl Hasanova.
Aıta ketý kerek, Almatyda bıyl 2 okrýg boıynsha depýtattar ornyn bosatqan bolatyn. Olardyń biri memlekettik qyzmetke ketse, ekinshisi sot úkiminen soń depýtattyq mandatyn tapsyrdy.
foto: vecher.kz
