Máslıhat depýtattyǵyna kandıdattardyń respýblıkalyq bıýdjet qarajatynan jabylatyn shyǵystarynyń mólsherleri bekitildi
Atalǵan másele boıynsha sóz sóılep, qaýly jobasymen tanystyrǵan OSK tóraǵasynyń orynbasary Vladımır Foostyń aıtýynsha, elimizdiń «Saılaý týraly» konstıtýtsııalyq zańyna sáıkes oblystyq, Astana jáne Almaty qalalyq máslıhattarynyń depýtattyǵyna tirkelgen árbir kandıdatqa bıýdjetten úgit is-sharalary men kóliktik shyǵystarǵa 245 myń teńge, al qalalyq jáne aýdandyq máslıhattar depýtattyǵyna kandıdatqa 153 myń teńge bólinedi.
«Onyń ishinde oblystyq, Astana men Almaty qalalyq máslıhattary depýtattyǵyna kandıdattarǵa telearnalardan saılaýaldy baǵdarlamamen sóz sóıleý úshin 70 myń teńge, qalalyq jáne aýdandyq máslıhat depýtattyǵyna kandıdattarǵa 36 myń teńge bólinedi. Oblystyq, Astana men Almaty qalalyq máslıhattary depýtattyǵyna kandıdattarǵa radıolardan saılaýaldy baǵdarlamamen sóz sóıleýge 20 myń teńge, qalalyq jáne aýdandyq máslıhat depýtattyǵyna kandıdattarǵa 7 myń teńge beriledi», - dedi ol.
V.Foostyń aıtýynsha, oblystyq, Astana men Almaty qalalyq máslıhattary depýtattyǵyna kandıdattarǵa basylymdarda eki maqala jarııalaý úshin 85 myń teńge, qalalyq jáne aýdandyq máslıhat depýtattyǵyna kandıdattarǵa 62 myń teńge qarastyrylǵan.
«Oblystyq, Astana men Almaty qalalyq máslıhattary depýtattyǵyna kandıdattarǵa jarııa saılaýaldy sharalaryn ótkizýge jáne úgit-nasıhat materıaldaryn shyǵarýǵa 25 myń teńge, qalalyq jáne aýdandyq máslıhat depýtattyǵyna kandıdattarǵa 25 myń teńge bólinedi. Oblystyq, Astana men Almaty qalalyq máslıhattary depýtattyǵyna kandıdattardyń kólik shyǵystaryna 45 myń teńge, qalalyq jáne aýdandyq máslıhat depýtattyǵyna kandıdattarǵa 20 myń teńge qarastyrylǵan», - dedi ol.
