Máslıhat depýtattarynyń Senat saılaýyna kelmeı qoıýy múmkin emes - OSK

ASTANA. QazAqparat - Máslıhat depýtattarynyń Senat saılaýyna kelmeı qoıýy múmkin emes. Búgin Ortalyq kommýnıkatsııalar qyzmetinde 1 qazanda ótetin Senat depýtattarynyń saılaýyna arnalǵan brıfıngte Ortalyq saılaý komıssııasynyń múshesi Lázzat Súleımen osylaı málim etti.

«Saılaý zańdy bolyp sanalýy úshin oblystardaǵy tańdaýshylardyń (máslıhat depýtattarynyń) 50 paıyzdan astamy oǵan kelýi tıis. Al daýys berý zańdy bolýy úshin tańdaýshylardyń jınalysyna qatysqan depýtattardyń 50 paıyzynan astamy daýys berýi shart. Máslıhat depýtattary - halyqpen tikeleı saılanǵan, halyqtyń senimin arqalaǵan azamattar. Sondyqtan da, olardyń saılaýǵa kelmeı qalý múmkindigi týraly áńgime joq. Óıtkeni, olar eldiń ókilderi retinde daýys beredi», - dedi Lázzat Súleımen.

Onyń aıtýynsha, saılaý úderisteri, onyń ishinde tirkeý, úgit-nasıhat júrgizý sharalary kezeń-kezeńimen bolǵanymen, daýys berýdiń ózi bir kúnniń ishinde ótedi. «Daýys berý, daýystardy sanaý men qorytyndysyn jarııalaýdyń barlyǵy buqaralyq aqparat quraldary men baıqaýshylardyń kózinshe, ashyq jáne jarııaly túrde júzege asady», - dedi L. Súleımen.

Eske sala keteıik, Memleket basshysy «Qazaqstan Respýblıkasy Parlamenti Senatynyń depýtattaryn saılaýdy 2014 jylǵy 1 qazanǵa taǵaıyndaý týraly» Jarlyqqa qol qoıǵan bolatyn.