Máslıhat depýtattarynyń saılaýynda barlyǵy 9 myń 165 azamat baq synaıtyn bolady - OSK
ASTANA. 21 jeltoqsan. QazAqparat /Aıdar Ospanalıev/- Keshe, 20 jeltoqsan kúni máslıhat depýtattyǵyna kandıdattardy tirkeý merzimi aıaqtaldy.
Aldyn ala málimetter boıynsha, máslıhat depýtattyǵyna kandıdat retinde usynylǵan 10 myńnan astam úmitkerlerdiń 9 myń 165-i depýtattyqqa kandıdat bolyp tirkeldi. Bul málimettermen búgin Ortalyq saılaý komıssııasynan soń jýrnalıstermen bolǵan baspasóz máslıhatynda OSK tóraǵasy Qýandyq Turǵanqulov tanystyrdy.
Onyń derekterinshe, oblystyq, Astana men Almaty qalalyq máslıhat depýtattyǵyna kandıdat bolyp 1 myń 752 adam tirkelse, aýdandyq máslıhat depýtaty bolý úshin 5 myń 523 adam saıası saıysqa túsedi. Al 1 myń 890 adam qalalyq máslıhat depýtatynyń mandaty úshin kúresedi. «Tirkelgen kandıdattardyń 3 myń 446-y «Nur Otan» halyqtyq demokratııalyq partııasynyń, 264-i Qazaqstannyń «Aq jol» demokratııalyq partııasynyń, 99-y Qazaqstannyń kommýnıstik halyq partııasynyń, 50-i Qazaqstannyń sotsıal-demokratııalyq «Aýyl» partııasynyń, 57-i «Ádilet» demokratııalyq partııasynyń, 21-i «Rýhanııat» partııasynyń, 11-i Qazaqstannyń patrıottar partııasynyń, 9-y Jalpyulttyq sotsıal-demokratııalyq partııasynyń, 3-i Qazaqstannyń «Azat» demokratııalyq partııasynyń, 1-ýi Qazaqstannyń kommýnıstik partııasynyń múshesi. Barlyq tirkelgen kandıdattar búginnen bastap saılaýaldy úgit-nasıhat jumystaryna kirise alady»,-dedi Q.Turǵanqulov.
