Máslıhat depýtattarynyń kezekti saılaýyna úmitkerler sany 9 myń 619 adamǵa jetti - OSK
ASTANA. 15 jeltoqsan. QazAqparat /Aıdar Ospanalıev/ - Keshe, 14-shi jeltoqsan kúni 2012 jyldyń 15-shi qańtaryna josparlanyp otyrǵan máslıhat depýtattarynyń kezekti saılaýyna úmitkerlerdi usyný aıaqtaldy.
Máslıhat saılaýyna úmitkerlerdi usyný úshin berilgen merzimde respýblıka boıynsha 9 myń 619 adam usynyldy. Bul málimettermen búgin elimizde ótkeli otyrǵan Májilis depýtattarynyń kezekten tys saılaýy men máslıhat depýtattarynyń kezekti saılaýyna baılanysty ótken baspasóz máslıhatynda Ortalyq saılaý komıssııasy tóraǵasynyń orynbasary Vladımır Foos tanystyrdy.
Onyń derekterinshe, máslıhat depýtattarynyń saılaýyna usynylǵan azamattardyń 1 myń 784-i oblystyq jáne Astana men Almaty qalalarynyń máslıhat depýtattary bolǵylary keledi. Al 5 myń 820 adam aýdandyq máslıhattyń depýtattyǵynan úmitti. Sondaı-aq 2 myń 15 adam qalalyq máslıhat depýtaty bolsaq dep otyr. «Osy ýaqytta elimiz boıynsha máslıhat depýtattarynyń saılaýyna kandıdat retinde 6 myń 773 adam tirkeldi. Kandıdattardy tirkeý sharasy 20 jeltoqsanǵa deıin jalǵasady. Al 21-shi jeltoqsannan bastap, saılaýaldy úgit jumystary bastalady»,-dedi V.Foos.
Memleket jergilikti ókiletti organdarǵa depýtat bolý úshin kandıdat bolyp tirkelgen árbir azamattyń úgit-nasıhat jumystaryn júrgizý úshin radıo, telearna men baspasózden birdeı kólemde ýaqyt bóledi. «Buǵan qosa máslıhat depýtattyǵyna kandıdattar baspasóz betterinen nemese elektrondy aqparat quraldarynan kóriný úshin óziniń jeke saılaý qoryn qura alady. Máslıhat depýtattyǵynan kandıdattardyń saılaý qorlarynyń eń joǵary kórsetkishi 10,5 mıllıon teńgeden aspaýy kerek. Bul shamamen alǵanda 71 myń AQSh dollary»,-dedi OSK tóraǵasynyń orynbasary.
