Máslıhat depýtattaryna úmitkerlerdi irikteý krıterıılerin naqtylaý qajet - T.Muqashev
NUR-SULTAN. QazAqparat - Partııalyq tizimge enetin Parlament, máslıhat depýtattyǵyna kandıdattardy tańdaýdyń naqty krıterıılerin ázirleý qajet. Bul týraly búgin Senat depýtattarynyń ortalyq atqarýshy jáne jergilikti ókiletti organdardyń basshylarymen kezdesýi barysynda sentor, "Qazaqstan máslıhattary depýtattarynyń birlesigi" RQB tóraǵasy Tóleýbek Muqashev aıtty, dep habarlaıdy QazAqparat tilshisi.
"Máslıhat depýtattaryna úmitkerlerdi irikteý krıterıılerin naqtylaý qajet dep esepteımin. Depýtatqa kandıdattyń ózgelerge, qoǵamǵa, uıymǵa nemese topqa áser etý qabilettiligi eskerilýi kerek. Bul jerde partııalyq tizimge enetin Parlament, máslıhat depýtattyǵyna kandıdattaryn tańdaýdyń naqty krıterııleri bolsa deımin", - dedi ol.
Senatordyń atap ótýinshe, depýtat belgili bir deńgeıde bolashaqty kóre biletin, qabyldanatyn sheshimderdiń túpki qorytyndysyna kóz júgirte alatyn táýekelshil bolýy kerek.
"Sol sebepten mindetti túrde máslıhat depýtattarynyń QR Prezıdenti janyndaǵy Memlekettik basqarý akademııasynda oqytylýyn engizýdi usynamyz. Bul máslıhattardyń sapaly jáne biliktiligi joǵary quramdy qalyptastyrýǵa múmkindik beredi",- dedi T.Muqashev.
Sonymen qatar ol máslıhat depýtattary úshin tıisti jaǵdaı jasaý qajettigine nazar aýdardy.
"Ol úshin máslıhat hatshysy laýazymynyń ataýyn ózgertý artqyly onyń mártebesin kóterý qajet. Hatshy uǵymy tehnıkalyq qyzmetker dep uǵynylady. Alaıda máslıhat hatshysy úlken ókilettikke ıe. Mysaly, memlekettik organdar men uıymdarda máslıhattyń ókili bolýy, máslıhattyń sheshimin iske asyrý boıynsha baqylaý júrgizý. Sol sebepten osy máseleni jaqsylap oılastyrýdy usynamyz. Sondaı-aq máslıhat hatshylarynyń eńbegine aqy tóleý máselesi osy kúnge deıin sheshilmeı keledi", - dedi senator.
Munan bólek T.Muqashev turaqty negizde jumys isteıtin máslıhat depýtattarynyń sanyn ulǵaıtýdy usyndy. Mysaly bıýdjet nemese áleýmettik máseleler boıynsha komıssııa tóraǵasyn turaqty negizde jumys isteıtin laýazymdy tulǵa retinde bekitý qajet.
"Máslıhat apparaty qyzmetkerleriniń shtat sany lımıtin úsh depýtatqa bir qyzmetker qatynasymen ulǵaıtý kerek. Al qazirgi ýaqytta bes depýtatqa bir qyzmetkerden keledi", - dedi ol.
