Máslıhat depýtattary másele kótermeıdi, sol úshin olardy kóbi tanymaıdy - Baıbek

NUR-SULTAN. QazAqparat - Qazaqstan aımaqtaryndaǵy máslıhat depýtattary turǵyndarmen belsendi jumys isteýi kerek. Bul týraly Nur Otan partııalyq baqylaý komıtetiniń otyrysynda partııa tóraǵasynyń birinshi orynbasary Baýyrjan Baıbek aıtty, dep habarlaıdy QazAqparat tilshisi.

«Búgingi tańda aımaqtyq quramdy kúsheıtý kerek. Máslıhat depýtattary belsendi bolǵany durys. Ókinishke qaraı, aımaq turǵyndary olardyń bárin tanı bermeıdi. Sebebi olar ózekti máselelerdi belsendi túrde kóterip jatqan joq. Al bul jerde memleket basshysy men partııa alǵa qoıǵan mindetterdi júzege asyrý áleýeti joǵary», - deıdi Baýyrjan Baıbek.

Ol Nur Otan partııasy azamattardyń senimin aqtap, alǵa qoıǵan mindetterdi abyroımen atqarýy kerektigin aıtty.

«Bizdi kóp ózgeris kútip tur. Basqarýshy partııa retinde óte ábjil qozǵalýymyz kerek. Qazirgi ýaqytta saılaýshylardyń senimine kirý ońaı emes. Azamattardyń pikiri jyldam ózgeredi, oǵan áleýmettik jeliler de aıtarlyqtaı áser etýde. Ár adam ózine «Partııa maǵan ne beredi?» degen suraq qoıady», - deıdi ol.

Partııa tóraǵasynyń birinshi orynbasarynyń sózinshe, áleýmettik jeli qoldanýshylary qoǵamdyq jumys qalaı atqarylyp jatqanyn jaqsy biledi.

«Sondyqtan máslıhat depýtattarynyń áleýmettik jelini qoldana bilýi óte mańyzdy. Bul – saılaýshymen tikeleı baılanysta bolý múmkindigi. Áleýmettik jeli arqyly qandaı másele týyndap jatqanyn bilip, ony jyldam sheshýge bolady», - deıdi Baýyrjan Baıbek.