Máslıhat depýtattary qaterli dertke shaldyqqan balalar úshin qan tapsyrdy

ALMATY. QazAqparat - Almaty máslıhatynyń depýtattary qaterli dertke shaldyqqan balalar úshin qan tapsyrdy, dep habarlaıdy QazAqparat.

Donor bolý týraly bastamany depýtat Ázirbaev Muhıt kótergen.

«Barlyǵymyzdyń maqsatymyz bir. Donorlyqty dáripteý, donor bolý degenińiz  ózge adamǵa ómir syılaý degen sóz. Bul boıymyzda adamgershilik sezimin oıatyp, ıman qundylyǵymyzdy arttyra túsedi», - dedi Muhıt Ázirbaev.

Sheneýniktiń bastamasyn birneshe depýtat qoldap, búgin donor bolý úshin qan ortalyǵyna keldi.

Qan ortalyǵy mamandarynyń aıtýynsha, donor qanynyń kólemi 65 paıyzǵa artyp keledi. 2008 jyldan beri donorlardyń sany 181795 adamnan 221 910 adamǵa ósken.

Aıta keteıik, jyl saıyn álemde 500 myń bala qaterli qan dertine shaldyǵyp jatyr, onyń 100 myńǵa jýyǵy ýaqytynda qan quıylmaǵan soń qaza bolýda.