Máslıhat depýtattary biliktilikti arttyrýdan ótedi
NUR-SULTAN. QazAqparat – Máslıhat depýtattary biliktiligin arttyrýdan ótedi. Mundaı norma búgin Parlamen Májilisiniń jalpy otyrysynda tıisti zań jobasyn talqylaý kezinde aıtyldy, dep habarlaıdy QazAqparat tilshisi.
Aıta keteıik, palata depýtattary «Qazaqstan Respýblıkasynyń keıbir zańnamalyq aktilerine aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Endi máslıhat depýtattary tıisti bıýdjet qarjysy esebinen qaıta daıarlyqtan ótýge jáne biliktiligin arttyrýǵa quqyly bolady. Ókiletti organnyń málimetinshe, bul maqsattarǵa 647 mln teńgege tarta qarjy bólinedi. Sonymen birge, zań jobasynda atalǵan normany qalaı iske asyrý tetigi eskerilmegen. Osy oraıda bul qadamdardy kimder, qalaı jáne qandaı formatta júzege asyrady?», - dedi depýtat Aıgúl Nurkına
Bul rette depýtat atalǵan norma tájirıbe júzinde qalaı júrgiziletinin surady.
QR Ulttyq ekonomıka mınıstri Áset Erǵalıevtiń aıtýynsha, oqytý bes jylda bir ret, ıaǵnı bastapqy eki jylda qamtylady. Bul turǵyda biliktilikti arttyrý memlekettik basqarý akademııasynyń fılıaldarynda bolady, sondaı-aq 40 akademııalyq saǵat eskeriledi.
Atap aıtqanda, zań jobasynda máslıhat pen onyń depýtattarynyń mártebesin arttyrý boıynsha birqatar túzetýler qarastyrylǵan. Máslıhat sessııasy tóraǵasynyń qyzmetin taratyp, onyń ókilettigin máslıhat hatshysyna berý usynylady. Bul zań jobasy óńirlerdiń derbestigi men jaýapkershilik deńgeıin arttyrýǵa jáne jergilikti mańyzy bar máselelerdi neǵurlym jedel sheshý úshin bıýdjettik rásimderdi aıtarlyqtaı jeńildetýge múmkindik beredi.
