Máslıhat depýtattaryna bıýdjetke túzetý engizý ýákiletin beretin zań jobasy maquldandy
ASTANA. KAZINFORM – Májilis «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zań jobasyn birinshi oqylymda maquldady.
Qujatty tanystyrǵan depýtat Ekaterına Smyshlıaeva zań jobasy jergilikti halyqtyń jıyn ótkizý talaptaryn reglamentteıtinin aıtty.
– Jıyn ótkizýge bastama kóterýshiler úshin habarlama tártibi engiziledi. Aýmaqtyq keńesterdiń qurylý tártibi men fýnktsııalary naqtylandy. Buǵan deıin aýmaqtyq keńester týraly norma is júzinde jumys istemeı, qoldanylmaı kelgen. Bul iri aýyldar men qala turǵyndarynyń basqarýǵa kóbirek qatysýyna múmkindik beredi, - dedi ol.
Baıandamashy usynylyp otyrǵan normalar máslıhattardyń rólin kúsheıtetinin aıtady.
Naqtyraq aıtsaq máslıhat depýtattaryna mynandaı ýákilettikter berilmek:
– Depýtattar ákimniń halyqpen kezdesýinen keıin qabyldanǵan jospardyń oryndalýyn baqylaýǵa qatysady;
– Depýtattarǵa bıýdjetke túzetýler engizýdi bastamashylyq etý, bıýdjet komıssııasynyń jumysyna qatysý jáne basqa da múmkindikter beriledi;
– Máslıhattardyń kommýnaldyq obektilerdi basqarýǵa qatysýy keńeıtiledi;
– Máslıhat depýtattarynyń depýtattyq saýaldary endi ashyq túrde jarııa etiledi;
– Máslıhat depýtattarynyń issapar shyǵyndaryn óteý qarastyrylǵan.
Ekaterına Smyshlıaeva máslıhat taratylǵan jaǵdaıda turaqty negizde jumys isteıtin depýtattarǵa tólemder beriletinin atap ótti.
– Máslıhat apparaty basshysyn taǵaıyndaý jáne qyzmetinen bosatý tártibi belgilenedi. Endi bul quzyret tikeleı máslıhat tóraǵasyna beriledi, - dedi depýtat.
Zań jobasyna óńirlerdiń qarjylyq derbestigin kúsheıtýge baǵyttalǵan normalar engizilip otyr.
Jergilikti bıýdjetterge taǵy úsh túrli tólem men aıyppul berilmek.
– Osylaısha jergilikti ózin-ózi basqarý organdary qarajatty bólýge jáne sheshim qabyldaýda kóbirek erkindik alady. Máslıhat qyzmetiniń ashyqtyǵyn arttyrý jáne tsıfrlandyrý kózdelip otyr. Mysaly sessııalardy onlaın kórsetý, qujattardy jarııalaý jáne hat almasýdy júrgizý talaptary engiziledi. Zań jobasy arqyly depýtattardyń jaýapkershiligi kúsheıtiledi jáne máslıhat tóraǵasynyń ókilettik merzimi shekteledi, - dedi Ekaterına Smyshlıaeva.
Eske salsaq, Prezıdent Qasym-Jomart Toqaev máslıhat depýtattarynyń ІІІ respýblıkalyq forýmynda ákimdiktegi bıýdjettik komıssııanyń quramyna bilimdi, bedeldi máslıhat depýtattaryn qosýdy usynǵan edi.
