Máslıhat depýtaty bolý úshin qansha jarna tóleý qajet
ASTANA. KAZINFORM — Máslıhat depýtattyǵyna kandıdattar saılaýǵa qatysý úshin 425 myń teńge kóleminde saılaý jarnasyn tóleýi kerek. Alaıda zańda belgilengen talaptarǵa baılanysty keı saıası partııalar jarnany tolyq tóleýden bosatylady nemese onyń azaıtylǵan mólsherin tóleıdi.
Bul týraly Ortalyq saılaý komıssııasynyń múshesi Ásel Janábilova túsindirdi.
Onyń aıtýynsha, aldaǵy máslıhat saılaýy aralas saılaý júıesi boıynsha ótedi, ıaǵnı, saılaýǵa saıası partııalar da, birmandattyq saılaý okrýgteri boıynsha usynylǵan kandıdattar da qatysa alady. Azamattar máslıhat depýtattyǵyna ózin-ózi usyný tártibimen de kandıdat bola alady.
«Qazaqstan Respýblıkasyndaǵy saılaý týraly» Konstıtýtsııalyq zańnyń 104-babyna sáıkes, partııalyq tizim usynǵan saıası partııalar tizimge engizilgen árbir kandıdat úshin belgilengen eń tómengi jalaqynyń bes eselengen mólsherinde saılaý jarnasyn tóleıdi. Qazirgi ýaqytta bul soma 425 myń teńgeni quraıdy.
Al ózin-ózi usynǵan azamat saılaý zańnamasynyń talaptaryna sáıkestigi tekserilgennen keıin, kandıdat retinde tirkelgenge deıin dál osyndaı mólsherde jarna engizýge mindetti.
Saılaý jarnasy qandaı jaǵdaıda qaıtarylady?
OSK ókiliniń túsindirýinshe, jarnany qaıtarý tártibi kandıdattyń nemese partııanyń saılaý nátıjesine baılanysty.
Saıası partııa saılaýǵa qatysqan saılaýshylar daýysynyń keminde 5 paıyzyn alǵan jaǵdaıda jarnasyn qaıtaryp alady. Sondaı-aq partııalyq tizimdegi jalǵyz kandıdat qaıtys bolǵan jaǵdaıda da jarna qaıtarylady.
Al ózin-ózi usynǵan kandıdat máslıhat depýtaty bolyp saılansa nemese daýys berýge qatysqan saılaýshylar daýysynyń keminde 5 paıyzyn alsa, engizgen jarnasy ózine qaıtarylady. Kandıdat qaıtys bolǵan jaǵdaıda da jarna qaıtarylady.
Qalǵan jaǵdaılarda saılaý jarnasy qaıtarylmaıdy jáne respýblıkalyq bıýdjet kirisine aýdarylady.
Qandaı partııalar jarnany tolyq tólemeıdi?
Zańnamada aldyńǵy saılaýdyń nátıjesine qaraı saıası partııalarǵa jeńildikter qarastyrylǵan. Tıisti saılaý okrýginde ótken máslıhat depýtattarynyń aldyńǵy saılaýynda saılaýshylar daýysynyń keminde 5 paıyzyn alǵan partııalar jarna tóleýden bosatylady.
Al 3 paıyzdan 5 paıyzǵa deıin daýys jınaǵan partııalar — belgilengen jarnanyń 50 paıyzyn, al 1 paıyzdan 3 paıyzǵa deıin daýys alǵan partııalar — onyń 70 paıyzyn tóleıdi.
Eske sala ketsek, 29 qarashada Qazaqstanda kezekten tys máslıhat saılaýy ótedi.
Buǵan deıin Ortalyq saılaý komıssııasy kandıdattardyń qashan tirkelip, úgit-nasıhat júrgize alatynyn jarııalaǵan edi.
