Máslıhat depýtaty Aldan Smaıylǵa Astananyń Qurmetti azamaty ataǵyn berýdi usyndy

ASTANA. KAZINFORM – Astana máslıhatynyń turaqty komıssııasy otyrysynda depýtat Baýyrjan Smaıylov qoǵam jáne memleket qaıratkeri Aldan Smaıylǵa elordanyń Qurmetti azamaty ataǵyn berýdi usyndy.

- Bir top áriptesimmen memleket jáne qoǵam qaıratkeri, jýrnalıst, jazýshy Aldan Smaıylǵa qalamyzdyń Qurmetti azamaty ataǵyn berýdi usynǵan edik. Bul - óte mańyzdy másele. Qalamyzda qazaq tiliniń damýyna úlken úles qosqan, qalamyzdyń tarıhyn jazǵan azamat. Osy ataqqa laıyqty dep sanaımyz, - dedi Baýyrjan Smaıylov.

Astana qalalyq tilderdi damytý jáne arhıv isi basqarmasynyń basshysy Sáken Esirkep ákimdik apparatynda elordanyń Qurmetti azamaty ataǵyn berý máselesin talqyǵa salatyn arnaıy komıssııa bar ekenin atap ótti. 

- Komıssııanyń erejesi, jumys tártibi bar. Iá, komıssııanyń bir múshesimin. Bul usynysty áriptesterimmen talqylaıyn. Tek men sheshetin másele emes. Basshylyq, komıssııa deńgeıinde talqylanatyn jaıt. Jalpy, Aldan Smaıyl aǵamyzdyń elordanyń damýyna qosqan úlesin, qaıratkerligin óte jaqsy bilemiz, qurmetteımiz. Árıne, laıyqty dep sanaımyn. Aldaǵy ýaqytta jumys tártibimen qarastyramyz, - dedi ol.

Osy oraıda Baýyrjan Smaıylov Aldan Smaıyldyń eshqandaı týystyǵy joq ekenin eskertip ótti.

Buǵan deıin elorda kósheleriniń birine armııan álipbıiniń negizin qalaǵan Mesrop Mashtotstyń esimi beriletindigin jazǵan edik.