Maskúnemdik pen qumar oıyndaryna salynǵandardy arnaıy kásipke beıimdeý kerek - depýtat
«Álemdi mezi qylǵan vırýstyń jańa túri (shtamy) halyqqa byltyrǵysynan aýyr tıgenin estip te, kórip te jatyrmyz. Ǵalamdyq indet qoǵamnyń qyzý talqysyna aınaldy. Bul jóninde bilgir mamandarmen, bilikti sarapshylarmen taıtalasqan ǵalamnyń nebir «aqylshy-keńesshileri», táýipteri áli kúnge deıin neshe túrli em-dom usynyp, jarysyp keledi. Ár kezde shıpany, derttiń daýasyn alkogolden, aıaq astynan baǵasy sharyqtaǵan ımbırden, adyraspannan, qoıdyń quıryq maıynan, taǵy basqa ónimderden izdep, eldi sharq urǵyzǵany da esimizde. Ókinishke qaraı, áli de «halyq emi» dep, qıly ishirtkilerin jarnamalaýshylar bar. Eń soraqysy – karantın kezinde ishimdikke táýeldi bolǵandardyń sany kúrt ósip ketkendigi málim bolyp otyr. Statıstıka komıtetiniń málimeti boıynsha, elimizdegi koronavırýsqa qarsy karantın mezgilinde araq, lıker ónimderin tutyný mólsheri 21,5 paıyzǵa ósken. Al spırt ishimdikteriniń ımmýnıtetti álsiretip, adam organızminiń juqpaly aýrýlar men vırýstarǵa qarsy qabiletin nasharlatatyny - belgili jaıt», - dedi D. Myńbaı
Onyń aıtýynsha, túrli qatańdatý, shekteý sharalaryna qaramastan, byltyr mas kúıinde kólik júrgizgen 8900 adam ustalǵan.
«Bul – dabyl qaǵarlyq meje. El bolyp, etek jınap, barlyq úkimettik mekemeler, úkimettik emes uıymdar, qoǵamdyq jáne dinı birlestikter, otbasy ınstıtýty tarapynan júıeli jumys júrgizip, nysanaly-maqsatty áreketke kóshpese, istiń nasyrǵa shabatyn túri bar. Ǵalamdyq keseldiń kesiri halqymyzǵa, ultymyzǵa tımesin desek, spırttik ishimdikterge, esirtkige, qumar oıyndaryna áýestilikti dárigerlerdiń kózqarasymen «dert» retinde ǵana baǵalaýdy qaıta qaraıtyn ýaqyt keldi. Dál qazirgi ýaqytta ondaı naýqastar úshin barlyq jaýapkershilik dárigerlerdiń moınynda dese bolady», - dedi depýtat.
Osyny eskere kelip, mynadaı usynystar engizildi:
1. Elimizde alkogolızmge, nashaqorlyqqa jáne qumar oıyndaryna qarsy kúres baǵdarlamasynyń jumysy 2015 jyly aıaqtalǵan.
«Deni saý ult» ulttyq jobasynyń 4-baǵytynda salaýatty ómir saltyn ustanatyn halyqtyń úlesin kóbeıtý josparlanǵan. Sonyń 8-sharasy alkogol men esirtkiler boıynsha Evropalyq mektep tekserisi jobasy metodologııasy boıynsha psıhobelsendi zattardy jastar arasynda tutyný jóninde zertteýler júrgizý jáne temeki, alkogol, PBZ tutynýdyń aldyn alý jóninde aqparattyq túsindirý jumysyn júrgizý kózdelgen. Soǵan tıisti qarjy qarastyrý qajet dep sanaımyz.
2. Maskúnemdikke, nashaqorlyqqa jáne qumar oıyndaryna salynǵandardy dýaldy oqytý arqyly arnaıy kásipke beıimdeý, qoǵamǵa qajetti jumystarǵa, volonterlyq qyzmetke, ekonomıkanyń basqa da sektorlaryna tartýǵa bolar edi.
«Bul baǵytta tıimdi jumys uıymdastyrý úshin jergilikti atqarýshy organdar men densaýlyq saqtaý oryndarynyń quzyretin keńeıtýdiń jóni bar dep oılaımyz. Óıtkeni zań talaby, berik dástúr júıesi, aıqyn memlekettik tetik qajet», - dedi D. Myńbaı.