Maskúnemderdi narkologııalyq mekemege jiberý protsedýrasy bıýrokratııaǵa aınalyp ketken - ІІM

ASTANA. QazAqparat – Maskúnemderdi májbúrlep emdeý úshin 11 medıtsınalyq mekeme qajet. Bul týraly Úkimet otyrysynda Іshki ister mınıstri Marat Ahmetjanov aıtty, dep habarlaıdy QazAqparat tilshisi.

«Májbúrlep emdeýdi qajet etetin «sozylmaly maskúnemder» úshin de tósek-oryn tapshylyǵy bar. Elimiz boıynsha bar-joǵy 21 ǵana mamandandyrylǵan narkologııalyq mekeme jumys isteıdi. Bul rette olarǵa azamattardy jiberý protsedýrasy asa bıýrokratııaǵa aınalyp ketken. Al, narkologııalyq mekemelerdiń medıtsına qyzmetkerleri men narkologter tıisti sheshim qabyldaǵysy kelmeıdi. Nátıjesinde, polıtseıler kóbinese bul máselemen tek ózderi júgiredi», - dedi Marat Ahmetjanov.

Mınıstrdiń atap aıtýynsha, polıtsııa qyzmetkerleri materıaldardy sottarǵa rásimdeıdi. Analızderdi tapsyrady, saraptamadan ótkizedi jáne quqyq buzýshyny jatqyzý úshin medıtsınalyq mekemege jetkizedi. Alaıda, bul salada qarjylandyrý qarastyrylmaǵan.

«Sottar májbúrlep emdeý týraly 4 myń materıal qaraǵan. Olardyń tek 72 paıyzy ǵana aýrýhanaǵa jatqyzylǵan. Jalpy, búgingi tańda osyndaı 11 medıtsınalyq mekemeniń jumysyn uıymdastyrý qajet», - dedi ol.

Buǵan deıin mınıstr bıyl otbasylyq-turmystyq salada 668 qylmys jasalǵanyn aıtty.