Maskúnemderdi májbúrlep emdeý úshin qosymsha mekemeler qajet - Qalmuhanbet Qasymov
ASTANA. QazAqparat - Maskúnemderdi májbúrlep emdeý úshin qosymsha mekemeler qajet. Bul týraly búgin halyqpen eseptik kezdesý ótkizgen QR Іshki ister mınıstri Qalmuhanbet Qasymov málim etti, dep habarlaıdy QazAqparat.
Mınıstrdiń aıtýynsha, elimizde árbir 7-shi qylmys, ıaǵnı kisi óltirý áreketteriniń jartysyna jýyǵy jáne otbasylyq-turmystyq zombylyqtardyń 60 paıyzy alkogoldiń kesirinen jasalady. Máselen, ótken jyldyń ózinde ǵana qoǵamdyq oryndarda mas kúıde júrgen 193 myń adam ustalǵan.
«Qazirgi ýaqytta polıtsııanyń jiti baqylaýynda 72 myń maskúnem bar. Onyń 10 myńnan astamy áıelder jáne 300-i kámeletke tolmaǵandar. Búginde elimizde Densaýlyq saqtaý mınıstrliginiń qaramaǵynda Ýaqytsha beıimdeý jáne detoksıkatsııa ortalyǵy dep atalatyn 615 orynǵa arnalǵan ne bári 31 medıtsınalyq aıyqtyrǵysh jumys isteıdi. Bul múldem jetkiliksiz. Elimizdegi olardyń jelisin jergilikti atqarýshy organdardyń qoldaýymen keńeıtilýi tıis dep sanaımyn. Mas kúıde ustalǵan tulǵany ne isteýimiz kerek? Aýrýhanalar qabyldamaıdy, polıtsııa olardy ózderiniń arnaıy mekemelerine qamaýyna esh negiz joq», - dep atap ótti Qasymov.
Sonymen qatar mınıstr alkogolızmge shaldyqqandardy májbúrlep emdeıtin narkologııalyq uıymdar sanynyń da az ekendigin aıtty. Búginde elimizde 2470 orynǵa arnalǵan 22 uıym bar. Taǵy 4 qosymsha ortalyq qajet.
«Ótken jyly sot sheshimimen bul uıymdarǵa 5300 adam jiberildi. Alaıda orynnyń joqtyǵy saldarynan 1 myńnan astam adam májbúrlep emdeýden ótken joq», - dedi Іshki ister mınıstri.
