Máskeýlik kásipkerler Qazaqstanmen yntymaqtastyq máselesin talqylady
MÁSKEÝ. KAZINFORM – Reseı astansyndaǵy Ahýaldyq ortalyq alańynda ótken «Máskeý – Qazaqstan» iskerlik dıalogynda Almaty oblysynyń ákimdigi, kvazımemlekettik sektor jáne kásipkerlerden quralǵan delegatsııa reseılik áriptesterimen jańa yntymaqtastyq baǵyttaryn talqylady, dep habarlaıdy agenttik tilshisi Qazaqstannyń Reseıdegi Elshiligine silteme jasap.
Forýmnyń maqsaty – eki el kásipkerleri arasyndaǵy ózara baılanysty nyǵaıtý jáne jańa iskerlik yntymaqtastyq baǵyttaryn aıqyndaý.
Forým barysynda saýda-ekonomıkalyq baılanystar, ónerkásiptik kooperatsııa, tsıfrlyq transformatsııa, shaǵyn jáne orta bıznesti qoldaý, týrızmdi damytý jáne mádenıet salasynda almasý máseleleri qaraldy.
Qazaqstannyń Reseıdegi Elshisi D.Abaev qatysýshylardy elimizdiń áleýmettik-ekonomıkalyq damýymen tanystyryp, Memleket basshysy Qasym-Jomart Toqaev Qazaqstan halqyna arnaǵan Joldaýynda sheteldik ınvestıtsııalardy ulttyq ekonomıkanyń negizgi salalaryna tartýǵa erekshe kóńil bólgenin atap ótti.
«Máskeý eksport ortalyǵy» avtonomdy kommertsııalyq emes uıym bas dırektory V.Stepanov Qazaqstan Máskeýdiń negizgi eksporttyq seriktesteriniń úshtigine turaqty túrde kiretinin aıtap ótti. Onyń aıtýynsha, barlyq salada turaqty ósim baıqalyp otyr, bul kezdesýdiń ózektiligin kórsetedi.
Máskeý úkimetiniń múshesi, Máskeý qalasynyń syrtqy ekonomıkalyq jáne halyqaralyq baılanystar departamentiniń basshysy S.Cheremınniń aıtýynsha, Qazaqstan men Reseı arasyndaǵy $28 mlrd kólemindegi taýar aınalymynyń úshten biri ($9 mlrd) Máskeý bıznesine tıesili.
2025 jyldyń birinshi toqsanynda bul kórsetkish 14,2%-ǵa artyp, $1,9 mlrd-qa jetti. Sonymen birge ol qarasha aıynda Prezıdent Q.Toqaevtyń Reseıge josparlanǵan memlekettik sapary aıasynda Astana men Almatyda Máskeý kúnderi ótkiziletinin habarlady.
Almaty oblysy týrızm basqarmasynyń basshysy Qýanyshbek Mırambekuly óńirdiń týrıstik áleýetin tanystyryp, belsendi demalys pen tabıǵatpen jaqyn tanysýǵa keń múmkindikter bar ekenin jetkizdi.
Máskeý týrızm komıteti tóraǵasynyń orynbasary Býlat Nurmuhanov 2024 jyly Máskeýge 26 mln týrıst kelgenin, olardyń 200 myńy – qazaqstandyqtar ekenin atap ótti.
– Bul áli shekteýli kórsetkish emes. Biz ózara iskerlik mıssııalar men tanystyrý týrlaryn uıymdastyrýǵa daıynbyz, – dedi ol.
Almaty oblysy kásipkerlik jáne ındýstrııalyq-ınnovatsııalyq damý basqarmasynyń basshysy Qýanysh Baqytuly óńirdiń tabıǵı, óndiristik jáne adamı resýrstaryna toqtalyp, oblystyń transshekaralyq logıstıkadaǵy strategııalyq rólin atap ótti. Ol máskeýlik kásipkerlerdi jańa birlesken jobalardy júzege asyrýǵa shaqyrdy.
Oblystyń tsıfrlyq tehnologııalar basqarmasynyń basshysy Aqyl Jandos Qanatuly óńirde iske asyrylyp jatqan negizgi tsıfrlandyrý jobalaryn tanystyrdy. Onyń aıtýynsha, zamanaýı tehnologııalardy engizý aımaqtyq ınfraqurylymdy basqarý tıimdiligin arttyrdy. Sondaı-aq «Almaty oblysynyń tsıfrlyq egizi» jobasynyń sátti júzege asqanyn jetkizdi.
Qazaqstannyń jeńil ónerkásip kásiporyndary qaýymdastyǵynyń vıtse-prezıdenti Inna Apenko elimizdiń fashion-ındýstrııasyn tanystyryp, qazaqstandyq «Global Nomads» brendin usyndy.
Forým sońynda iskerlik baılanystar bırjasy ótti. Qazaqstandyq jáne reseılik kásipkerler yntymaqtastyqtyń keleshegin talqylap, Almaty oblysy ákimdigi men QR Elshiligi ókilderi reseılik bıznes ókilderiniń suraqtaryna jaýap berdi.
Aıta keteıik, Astanada Qazaqstan men Mońǵolııanyń 100-ge jýyq kásipkeri bas qosty.