Máskeýlikter qazaqstandyqtardy Konstıtýtsııa kúnimen qazaqsha quttyqtady
«Mereke qutty bolsyn!», «Alǵa, Qazaqstan!» máskeýlikter Qazaqstan halqyn aıtýly meırammen osylaı quttyqtaýda. Reseı astanasynyń Chıstoprýdnyı býlvaryndaǵy tilekter qazaq tilinde aıtyldy», - delinedi YouTube beınehostıngine RF-daǵy Qazaqstan Respýblıkasynyń Elshiligi jarııalaǵan vıdeoǵa jazylǵan túsiniktemede.
Qala turǵyndary ózderine tanys emes tilde quttyqtasa da, olardyń sózderinen jylylyq pen shynaıylyq baıqalady. Dıplomatııalyq keńseniń Feısbýktegi resmı paraqshasynda máskeýlikterdiń shyn júrekten baýyrlas halyqqa amandyq, izgilik jáne baqyt tilegeni aıtylady.
Buryn belgili bolǵanyndaı, Máskeýde oqyp júrgen qazaq stýdentteri, «Bolashaq» baǵdarlamasynyń stıpendıattary, sondaı-aq «Jas Tulpar» Qazaqstan stýdentteri birlestiginiń belsendileri Reseıdegi Qazaqstan Elshiliginiń qoldaýymen Qazaqstan Respýblıkasynyń Konstıtýtsııa kúnine oraı fleshmob uıymdastyrǵan. Mereke kúni Uly Abaı eskertkishiniń mańyndaǵy Chıstoprýdnyı saıabaǵy fleshmobqa qatysýshylar jelbiretken Qazaqstan Memlekettik Týynan kók túske boıanǵan.