Máskeýlik dárigerler elordalyq áriptesterimen balalar reanımatologııasy salasyndaǵy tájirıbelerimen bólisýde
ASTANA. 21 maýsym. QazAqparat - Elordalyq dárigerlerge anestezıologııa, reanımatologııa jáne toksıkologııa baǵytyndaǵy óz biliktilikterin arttyrý múmkindigi týyndady.
Astanada qalalyq densaýlyq saqtaý basqarmasynyń shaqyrýy boıynsha 17-28 maýsym aralyǵynda Reseı Medıtsına akademııasy kafedrasynyń (Reseı, Máskeý qalasy) balalar jasyndaǵy anestezıologııa, reanımatologııa jáne toksıkologııasy boıynsha dıplomnan keıingi bilimniń eki aptalyq kóshpeli tsıkli josparlanǵan.
«Balalar jasyndaǵy anestezıologııa jáne reanımatologııa» taqyrybyndaǵy semınar qalalyq balalar juqpaly aýrýlar aýrýhanasynda ótedi. Bul týraly astana.kz saıtyna qalalyq densaýlyq saqtaý basqarmasynan habarlady.
«Atalǵan oqytýdyń maqsaty - Astananyń anestezıolog-reanımatolog dárigerleriniń tájirıbesine reseılik mamandardyń dıagnostıkadaǵy jańa tásilderin, údemeli terapııanyń ozyq úlgilerin engizý, sol arqyly balalarǵa dárigerlik kómek kórsetý sapasyn arttyrýǵa kómektesip, sábıler arasyndaǵy shetineýdi azaıtý»,- dep atap kórsetedi vedomstvodan.
Basqarma ókiliniń aıtýynsha, semınar anestezıologııa jáne balalarda kezdesetin toksıkologııa men reanımatologııadaǵy jańa tehnologııalar men ınnovatsııalardy talqylaýǵa jaqsy múmkindik beredi.
Semınar aıasynda Astana qalasynyń medıtsınalyq uıymdarynyń 25 anestezıolog-reanımatolog dárigeri bilimderin jetildiredi.
