Máskeýge jaýǵan qalyń qardan keptelis údep, taksı baǵasy sharyqtady
MÁSKEÝ. KAZINFORM — 18 aqpanǵa qaraǵan túni Máskeý men oblys aýmaǵyna qalyń qar jaýyp, táýlik sońyna deıin ártúrli qarqynmen jalǵasatyny habarlandy. Qardyń mol túsýine Adrıatıka teńiziniń soltústiginen Ortalyq Reseıge jetken tsıklon sebep bolǵan, dep jazdy TASS agenttigi.
Sınoptıkter boljamy
RF Gıdrometortalyǵynyń málimetinshe, qardyń eń qarqyndy kezeńi 19 aqpan kúni tańǵy 09:00–12:00 aralyǵyna sáıkes keledi. Keıin jaýyn-shashynnyń qarqyny birtindep báseńdeıdi.
Qarly boran, kóktaıǵaq jáne joldaǵy qar úıindilerimen qatar júretin bul qolaısyz aýa raıy kezinde elordada 25 mm-ge deıin jaýyn-shashyn túsýi múmkin. Qar jamylǵysynyń qalyńdyǵy 31 sm-ge deıin ulǵaıady dep kútilýde. Mamandardyń aıtýynsha, sońǵy 56 jyldaǵy táýliktik jaýyn-shashyn rekordy jańarýy yqtımal.
Qatty boran men sekýndyna 17 metrge deıin jetetin jel ekpinine baılanysty Máskeý men oblysta «qyzǵylt sary» (qaýipti) aýa raıy deńgeıi jarııalandy.
Áýejaılar jumysy
Sheremetevo, Vnýkovo, Domodedovo jáne Jýkovskıı áýejaıy qalypty rejımde reısterdi qabyldap, jóneltýde. Degenmen, aýa raıyna baılanysty 19 reıs ushyp kelý jáne ushyp ketý baǵytynda toqtatylǵan. Taǵy 14 reıs eki saǵattan astam ýaqytqa keshiktirilgen.
Qosymsha muzǵa qarsy óńdeý jumystaryna baılanysty da qysqa merzimdi kidirister tirkelgen. Áýejaılar kúsheıtilgen rejımde jumys istep, ushý-qoný jolaqtary turaqty túrde tazartylyp, arnaıy reagenttermen óńdelip jatyr.
Joldaǵy jaǵdaı
Qalyń qar túsýine baılanysty qala kóshelerindegi keptelis deńgeıi 10 baldyq shkala boıynsha 9 ballǵa jetken. Qozǵalys ásirese ortalyq kóshelerde, Sadovoe, Býlvarnoe jáne Úshinshi kólik saqınasynda qıyndaǵan. Máskeý aınalma avtojoly (MKAD) boıynda da kólik qozǵalysy baıaýlaǵan.
Taksı qyzmetiniń baǵasy keı baǵyttarda 2–3 esege deıin ósken. Sarapshylar qarbalas ýaqytta sapar uzaqtyǵy 30%-ǵa deıin uzarýy múmkin ekenin eskertti.
Qalalyq qyzmetterdiń jumysy
Kommýnaldyq qyzmetter táýlik boıy qar tazalaý jumystaryn júrgizip jatyr. Jaıaý júrginshiler aımaqtary, trotýarlar, aıaldamalar, metro stantsııalary men áleýmettik nysandar mańy erekshe baqylaýǵa alynǵan.
Qala meri Sergeı Sobıanın barlyq qyzmetterdiń kúsheıtilgen rejımde jumys istep jatqanyn málimdedi. Kósheler men negizgi magıstraldar mehanıkalandyrylǵan ádispen tazartylyp, kóktaıǵaqqa qarsy óńdeý turaqty túrde qaıtalanyp jatyr.
Qazirgi tańda Máskeý óńirindegi áýe jáne jerústi kóligi qozǵalysy tıisti organdardyń erekshe baqylaýynda.
Aıta keteıik, Reseıde qańtar aıyndaǵy jyldyq ınflıatsııa 6 paıyzdy qurady.