Máskeýge keıingi 150 jylda bolmaǵan qalyń qar jaýdy
ASTANA. KAZINFORM – Búgin Reseı astanasynda sáýir aıynyń sońyndaǵy jaǵdaı boıynsha qardyń qalyńdyǵy rekord ornatyp, 12 sm-ge jetti. Bul týraly sınoptık Mıhaıl Leýs óziniń Telegram-arnasynda habarlady, dep jazady Kazinform agenttiginiń Máskeýdegi menshikti tilshisi.
— Tańerteń astanada qar jamylǵysynyń bıiktigi 12 santımetrge jetti. Bul rekord sanalady, 27 sáýirde Máskeýde mundaı qalyń qar buryn-sońdy bolmaǵan. Buǵan deıingi rekord 10 santımetr bolǵan jáne 55 jyl boıy saqtalǵan, — dep jazdy ol.
Sonymen qatar, 27 sáýirge qaraǵan túni Máskeýde 16 mıllımetr jaýyn-shashyn tústi. Bul kórsetkish táýliktik rekordtan asyp tústi — buǵan deıingi eń joǵary deńgeı 1880 jyly tirkelip, 14,7 mıllımetr bolǵan.
Sınoptıktiń aıtýynsha, jaýyn-shashyn áli de jaýyp jatyr. Sondyqtan jańa rekordtyń naqty máni meteorologııalyq táýlik aıaqtalǵannan keıin, ıaǵnı keshki saǵat 21:00-den soń belgili bolady.
Osyǵan deıin SQO-da mamyr aıynda kún raıy qandaı bolatyny týraly jazdyq.
