Máskeýdiń ortalyǵyndaǵy jańa elıtalyq páterlerdiń baǵasy 3-5 mln. dollarǵa jetti
ASTANA. 26 mamyr. QazAqparat - 2012 jylǵa qaraǵanda Máskeýde qymbat jańa qurylystar naryǵynda elıtalyq turǵyn úı satyp alýdyń ortasha bıýdjetiniń ulǵaıýy úrdisi baıqaldy, dep habarlady RBK.
Eger ótken jyly salynyp jatqan nysandarda elıtalyq naryqta ortasha bıýdjeti 1-2 mln. dollardyń turǵyn úılerine suranys bolsa, bıyl 3-5 mln. dollar turatyn páterlerge suranys kóbeıdi. Bul úrdisti TWEED jyljymaıtyn múlik agenttiginiń bas dırektory Irına Mogılatova da qýattap otyr. «Ótken jylmen salystyrǵanda, joǵary dárejede ázir bolǵan elıtalyq jyljymaıtyn múlikke suranys shamamen 30 paıyzǵa ósti», dep atap ótti ol.
Buǵan ózderiniń kapıtalyn ulǵaıtýǵa múddeli ınvestorlar ǵana emes, óz qarjysyn senimdi saqtaýǵa nıetti satyp alýshylar da yqylas bildirip otyr. Olar qarjyny aqshalaı saqtaǵannan góri jyljymaıtyn múlikke aýdarǵan durys dep sanaıdy.
Máskeýdiń Ortalyq ákimshilik okrýginde búginde 50 korpýs jańa úıler satýǵa qoıyldy. Okrýgtegi joǵary bıýdjetti turǵyn úıdiń jalpy kólemi 354,8 myń sharshy metrdi quraıdy. Al bul úılerdegi ár sharshy metrdiń baǵasy 564 myń rýblge jetti. Eger І sharshy metrdiń ortasha baǵasyn satýǵa qoıylǵan kólemge kóbeıtetin bolsaq, Ortalyq ákimshilik okrýgindegi elıtalyq jańa qurylystardy satýshylar 200 mlrd. rýbl paıda tabady.
