Máskeýdi «mınalaý» jalǵasýda: saýda ortalyqtarynan 12 myńǵa jýyq adam shyǵaryldy
ASTANA. QazAqparat - Máskeýde shuǵyl qyzmetter jarylǵysh zattar týraly habarlamalardan keıin alty saýda ortalyǵynda tekserý júrgizýde. Bul týraly TASS agenttigine quqyq qorǵaý organyndaǵy derekkóz málim etti.
«Tekserýler «Domodedovskıı» saýda ortalyǵynda, Profsoıýznyı jáne Novoıasenevskıı kóshelerindegi «Prınts plaza» saýda ortalyqtarynda, Hımkıdegi «Kapıtolıı» SO-da, «Kalýjskıı» jáne «Azovskıı» saýda ortalyqtarynda júrýde. Ǵımarattardan tekserý ýaqytynda 12 myńǵa jýyq adam evakýatsııalandy», - dep habarlady agenttiktiń suhbattasy.
Saýda ortalyqtarynyń ǵımarattarynda kınologııalyq qyzmetter jumys isteýde.
Aıta keteıik, buǵan deıin jarylǵysh zattardyń qoıylǵandyǵy týraly qońyraýlarǵa sáıkes, Máskeýdiń eki saýda ortalyǵynda jáne 20-ǵa jýyq ǵımaratta - murajaılarda, «ıAndeks» keńsesinde, «Mosfılm» kınostýdııasynda tekserister júrgizilgeni habarlanǵan bolatyn.
Reseı qalalaryndaǵy mektepterde, joǵary oqý oryndarynda, saýda ortalyqtary men ákimshilik ǵımarattarda, áýejaı men vokzaldarda bomba qoıylǵandyǵy týraly qońyraýlar legi 11 qyrkúıekten bastap túsýde. Tekserýler barysynda habarlamalar jalǵan ekeni anyqtalýda, biraq týýy múmkin qaýipke baılanysty myńdaǵan adam qaýipsiz jerge kóshirilýde .
