Máskeýdi qorǵaýda qazaqstandyqtar asqan erlik kórsetti
ALMATY. Qarashanyń 25-i. QazAqparat /Ádilet Musahaev / - Búgin Almatyda Uly Otan soǵysy kezinde Máskeýdi qorǵaýda eren erlik kórsetken qazaqstandyqtardy eske alýǵa arnalǵan merekelik festıval ótti,
dep habarlaıdy QazAqparat.
Sharanyń maqsaty - Jeńisti ardaqtap, qaza tapqandardy eske alý jáne kózi tiri ardagerlerge qurmet kórsetý. Osydan 68 jyl buryn Keńes armııasy Máskeý túbinen fashısterdi ysyryp tastaǵan bolatyn. Bul jaǵdaı qazaqstandyqtar úshin óte mańyzdy, áıgili qolbasshylar Ivan Vasılevıch Panfılov pen Baýyrjan Momyshuly shaıqasqan dıvızııa Almatyda jasaqtalǵan bolatyn. Qazirgi ýaqytta Almatyda Máskeýdi qorǵaýǵa qatysqan 50 ardager turady, onyń 6-ýy Panfılov dıvızııasynyń ardageri.
Festıval aıasynda «Saltanat», QR Qorǵanys mınıstrliginiń ansambli, Jaıaý áskerler ınstıtýtynyń jáne «Іle sazy» balalar ansamblderi óner kórsetti.
