Máskeýden taksımen kelgen aqtóbelikterden koronavırýs anyqtaldy
AQTÓBE. QazAqparat – Máskeýden taksımen kelgen aqtóbelikterden koronavırýs ınfektsııasy anyqtaldy, dep habarlaıdy QazAqparat tilshisi.
18 sáýir kúni (saǵat 09.30-daǵy jaǵdaı boıynsha) Aqtóbe oblysynda jańadan 2 oqıǵa tirkeldi.
«Búgin eki adamnyń koronavırýs ınfektsııasyn juqtyrǵany anyqtaldy. Er adam Reseıden Jaısań shekara beketine deıin taksımen kelgen. Ol indet juqtyrǵan adamnyń janynda otyrǵan. Al indetke shaldyqqan ekinshi adam qala turǵyny bolyp shyqty. Ol da buǵan deıin naýqas adammen baılanysta bolǵan», - dedi oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetinen.
Aıta keteıik, keshe keshkilik Aqtóbe qalasynda 26 jáne 22 jastaǵy jigitterden, 75 jastaǵy qarııadan indet anyqtaldy. Sonymen birge shekara beketinde karantındik gospıtalde jatqan eki adam vırýs juqtyrǵan bolatyn.
«1978 jyly týǵan Aqtóbe oblysynyń azamaty Reseıden poıyzǵa minip, odan soń Jaısań aýylyna deıin taksımen kelgen. Dereý karantındik statsıonarǵa jatqyzylyp, analız alyndy. Al indet juqtyrǵan shekaradaǵy ekinshi adam 1986 jyly týǵan. Er azamat Túrkistan oblysynyń turǵyny. Ol Máskeý qalasynan taksımen kelip, Jaısań aýylyndaǵy karantındik statsıonarǵa túsken. Jóteli bolǵasyn provızorlyq statsıonarǵa aýystyrylyp, odan KVI-ǵa analız alyndy. Ol oń nátıje kórsetti. Qazirgi tańda dertke shaldyqqan Aqtóbe qalasynyń azamattary oblystyq juqpaly aýrýlar statsıonarynyń boks palatasyna, Jaısańdaǵy naýqastar sol jaqtaǵy provızorlyq statsıonarǵa jatqyzyldy. Naýqastardyń jaǵdaıy qanaǵattanarlyq. Bekitilgen hattamaǵa sáıkes tıisti emdik sharalar júrgizilip jatyr», - dep habarlady baspasóz qyzmetinen.
Naýqastarmen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alyndy. Aýrý oshaqtarynda epıdemıologııalyq zertteý jumystary, dezınfektsııa júrgizildi.
Sońǵy málimetter boıynsha, Aqtóbe oblysynda COVID-19 ınfektsııasyn barlyǵy 25 adam juqtyrǵan. Úsh adam dertinen aıyǵyp shyqty.
