Máskeýden Soltústik Koreıaǵa alǵashqy tikeleı reıs Phenıanǵa qondy

ASTANA. KAZINFORM — Ushaqty Phenıan áýejaıynda úlken saltanatpen qarsy aldy, dep habarlaıdy TASS aqparat agenttigi.

Reseı tarapynan Máskeý men Phenıan arasyndaǵy saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııany basqaratyn Tabıǵı resýrstar mınıstrliginiń basshysy Aleksandr Kozlov bastaǵan reseılik delegatsııa men ekıpaj múshelerine gúl shoqtary tabys etildi.

Ushý Boeing 777-200ER ushaǵynda oryndaldy, ol 440 jolaýshyny syıdyra alady. Ushaq Sheremetevodan 27 shildede Máskeý ýaqytymen 19:30–da ushty, jol júrý ýaqyty shamamen segiz saǵat.

Ushý kezinde barlyq habarlandyrý orys jáne káris tilderinde jasaldy. 

Keri reıs 29 shildege jergilikti ýaqyt boıynsha saǵat 09:00–de (Máskeý ýaqytymen 3:00) josparlanǵan.

Shilde aıynyń basynda Rosavıatsııa Nordwind áýe kompanııasyna KHDR-ǵa ushýǵa ruqsat berdi. Máskeýden Phenıanǵa bılet satý 18 shildede bastaldy, baǵasy 44,7 myń rýblden bastalady. 

Kozlovtyń aıtýynsha, reıster odan ári aıyna bir ret oryndalady. Tabıǵı resýrstar mınıstrliginiń basshysy bul reıstiń ashylýy tarıhı oqıǵa ekenin atap ótip, eki astanany baılanystyrýdyń mańyzdylyǵyna toqtaldy.

Avıatsııalyq yntymaqtastyqty keńeıtý maýsym aıynda Reseı Syrtqy ister mınıstrliginiń resmı ókili Marııa Zaharova Máskeý men Phenıan áýe qatynasyn keńeıtý týraly kelissóz júrgizip jatqanyn málimdegen.

Soltústik Koreıanyń Air Koryo áýe kompanııasy Vladıvostok pen Phenıan arasynda tikeleı reısterdi aptasyna úsh ret — dúısenbi, sársenbi jáne juma kúnderi oryndaıdy.

Memleketter arasyndaǵy tikeleı áýe qatynasy 2023 jyldyń tamyzynda qaıta jandandy, ol pandemııaǵa baılanysty úzilgen bolatyn.

Phenıanǵa bıletterdi bólek satyp alý múmkin bolmady, sebebi olar týrısterge tek ekskýrsııalyq týrdyń bir bóligi retinde satyldy.

RF men KHDR arasyndaǵy jolaýshylar temirjol qatynasy 2020 jyldyń aqpan aıynda COVID-19 indetine baılanysty toqtatyldy. 2024 jyldyń jeltoqsan aıynyń ortasynda Reseı temir joldary KHDR Temir jol mınıstrligi qurǵan Týmangan (KHDR) — Hasan (RF) baǵyty boıynsha № 645/646 halyqaralyq poıyzdyń qozǵalysyn qalpyna keltiretinin habarlady. Máskeý men Phenıan arasyndaǵy jolaýshylar temirjol qatynasy 17 maýsymda qaıta jandandy.

Aıta ketelik Soltústik Koreıa Bitcoin qory boıynsha álemde úshinshi orynǵa kóterilgen edi.