Máskeýden shyqqan týrıstik-tanymdyq ekspedıtsııa Qyzylordaǵa keldi
QYZYLORDA. KAZINFORM — Keshe Qyzylordaǵa Ortalyq Azııa memleketteri men Reseıden 100-den astam týrıst taban tiredi.
«Eýrazııa júregine saıahat — 2025» biregeı týrıstik-tanymdyq ekspedıtsııasy maýsym aıynyń basynda Máskeýden shyqqan.
Bul týraly Qyzylorda oblysynyń dene shynyqtyrý, sport jáne týrızm basqarmasynan habarlady.
Ekspedıtsııa músheleri sodan beri san ǵasyrlyq tarıhy bar qalalardy aralap, ádet-ǵurpymen jáne mádenıetimen tanysyp úlgerdi. Maqsaty — Ortalyq Azııa elderi men Reseı arasyndaǵy iskerlik, gýmanıtarlyq jáne ǵylymı baılanysty nyǵaıtý, sondaı-aq halyqaralyq áriptestikti damytý.
— Syr boıyna sapary kezinde qonaqtar Aral aýdanyna baryp, Balyqshylar alleıasyn tamashalap, Aral teńizi týraly qundy málimet aldy. Odan keıin XIX ǵasyrdaǵy orys sáýlet óneri úlgisinde salynǵan Balyqshylar mýzeıine bardy. Munda «Balyqshylar», «Kemeler» zaly jáne ashyq aspan astyndaǵy mýzeı kórmesi uıymdastyrylǵan. Mýzeı qoryndaǵy qundy jádigerlermen tanys bolǵan qurmetti qonaqtar erekshe áser alyp, teńiz tarıhyn qyzyǵýshylyqpen tyńdady. Ekspedıtsııa Shıjaǵa eldi mekenindegi qumdy tóbeler men óńirdegi biregeı demalys aımaǵy sanalatyn «Qambash» kólinde jalǵasty, — delingen habarlamada.
Baǵdarlamaǵa sáıkes endi olar Baıqońyr qalasy, Qarmaqshy aýdanyndaǵy Qorqyt ata memorıaldy kesheni men Qyzylorda qalasyndaǵy birneshe mádenı-sporttyq nysandy aralaıdy.
Al 22 mamyrda Marrakesh-Almaty mototsıkl týrymen jolǵa shyqqan marokkolyq kásipker jáne saıahatshy Ábýfırass Ábdilǵanıdiń 11 maýsym kúni Qyzylorda qalasyna aıaldaǵanyn jazǵanbyz.