Máskeýdegi Sheremetevo áýejaıynda ushaq er adamdy qaǵyp ketti
MÁSKEÝ. QazAqparat - Sheremetevo áýejaıynan ushyp bara jatqan «Máskeý-Afıny» baǵytyndaǵy ushaq er adamdy qaǵyp ketip, mert qyldy, dep habarlaıdy «QazAqparat» TASS agenttigine silteme jasap.
«Sheremetevo áýejaıynda Máskeý-Afıny baǵytymen ushqaly jatqan áýe kemesiniń ekıpajy ushyp-qoný jolaǵynyń boıymen qozǵalyp bara jatqan kezinde jergilikti ýaqyt boıynsha saǵat 20:10-da belgisiz zatpen soqtyǵysqany týraly habar bergen. Oqıǵa ornyn tekserý faktisi barysynda onda er adamnyń óli denesi, kıimi jáne ózge de jeke zattary tabyldy», - dedi áýejaıdyń qoǵammen baılanys dırektsııasynyń basshysy Anna Zaharenkova.
Onyń aıtýynsha, oqıǵa ornyna «Apattar medıtsınasy» ortalyǵy men jedel járdem brıgadalary, avıatsııalyq qaýipsizdik jáne kóliktik polıtsııa qyzmetteri dereý kelip jetken.
«Qaza bolǵan er adamnyń aty-jóni anyqtaldy, aqparat tıisti jedel is-sharalardy ótkizý úshin polıtsııaǵa jiberildi» dep naqtylady ol.
Atalǵan fakti boıynsha tekserý jumystary bastaldy. Oqıǵa ornynda tergeý-jedel toby jumys istep jatyr.
Prokýratýra, sondaı-aq, Sheremetevo áýejaıyndaǵy ushyp-qoný jolaǵynda er adamnyń óliminen keıin avıatsııalyq qaýipsizdikti qamtamasyz etý týraly zań talaptarynyń oryndalýyn tekserýdi bastady. Tekserý qorytyndysy boıynsha, negizdemeler bar jaǵdaıda tıisti prokýrorlyq eleý sharalaryn qabyldaý máselesi sheshiledi.
