Máskeýdegi «Sheremetevo» áýejaıynda habarlandyrý qazaq tilinde aıtylady
MÁSKEÝ. QazAqparat – Juma kúni «Sheremetevo» Máskeý halyqaralyq áýejaıynda «S-1» termınalynyń resmı ashylýy boldy, dep habarlaıdy «QazAqparat» HAA-nyń Máskeýdegi menshikti tilshisi.
«S-1» tek halyqaralyq reısterge qyzmet kórsetetin bolady. Alǵashqyda munda «Aeroflottyń» barlyq reısteri aýystyrylady. Termınal jylyna 20 mıllıonǵa jýyq jolaýshyǵa qyzmet kórsetýge qaýharly. Onyń ashylýymen áýejaıdyń ótkizý múmkindigi jylyna 80 mıllıon adamǵa deıin artady. 2024 jyldan keıin Sheremetevoda termınaldyń ekinshi kezeńi - «S-2»-niń qurylysyn (jylyna 10 mln jolaýshy) bastaý kózdelgen.
«S-1» termınalynda jolaýshylardy tirkeıtin 84 oryn bar. Bıometrııalyq tólqujattardyń ıelerin azamattyń qatysýynsyz ótkizetin avtomatty pasporttyq baqylaý beketi qarastyrylǵan.
Sondaı-aq 2,5 myń mashınaǵa arnalǵan alty qabatty parkıng jumys isteıdi.
Ashylý saltanatynda «Sheremetevo» Halyqaralyq áýejaıynyń» Dırektorlar keńesiniń tóraǵasy Aleksandr Ponomarenko termınaldyń qurylysyna 32 mlrd rýbl (196 mlrd 160 mln teńge) jumsalǵanyn atap ótti.
Áýejaıda Aqparattyq habarlandyrýdyń avtomatty júıesi engizilgen. Máselen, nysannyń tórt termınalynda (C, D, E jáne F) reıstiń ushý baǵytyna baılanysty aqparat orys, aǵylshyn jáne qazaq tilderinde aıtylady. Onymen qosa, barlyq dybystyq habarlandyrýlar áýejaıda ornatylǵan monıtorıngte júgirtpe jolda kórsetilip otyrady.
Avtory Narymbek Ismaǵulov
Foto: Marına Lystseva/TASS
