Máskeýdegi Ramazan shatyrynda musylman halyqtarynyń keshteri ótedi

ASTANA. QazAqparat - Qasıetti Ramazan aıynyń qarsańynda, sársenbi kúni Máskeýdegi Taǵzym taýynda ashylǵan Ramazan shatyry búgin tańda alǵashqy qonaqtaryn qabyldaı bastaıdy, dep habarlaıdy TASS.

Shatyrdyń esigi osy aı boıy osymen ekinshi jyl qatarynan kelýshiler úshin kúni-túni ashyq bolmaq. Munda 18 myńǵa deıin adamdy qabyldaý josparlanyp otyr. Olar úshin túrli taǵamdar ázirlenip, reseılik respýblıkalardyń basshylarymen jáne ıslam elderiniń elshilerimen kezdesýler, Quran oqýdan halyqaralyq jarys tárizdi sharalar ótkizý qarastyrylyp otyr.

«Ultyna, dinine qaramastan, barlyq kelýshiler shyǵys taǵamdarynan ázirlengen merekelik keshki asqa shaqyrylyp, Reseı halyqtarynyń mádenıetimen tanysa alady», dep habarlady uıymdastyrýshylar.

Reseıdiń múftıler keńesiniń baspasóz qyzmetinde ár kesh saıyn Ramazan shatyrynda erekshe sharalar uıymdastyrylatynyn, bıyl Qyrym Respýblıkasynyń, úndilik musylmandardyń jáne syǵan musylmandary qaýymynyń keshteri ótetinin habarlady. Sondaı-aq adamdarǵa degen súıispenshilik, keshirimdilik, meıirbandylyq, alǵys bildirý, tózimdilik, jomarttyq, adaldyq jáne t.s.s. ımandylyq qasıetterdiń árqaısysy bir-bir keshtiń taqyrybyna aınalmaq.